لما الوجع يعلمك تبني نفسك من تحت الصفر
بقلم/نشأت البسيوني
في لحظة مابتكونش مرتب لها تلاقي نفسك واقع فجأة من ارتفاع كبير وتحس ان الدنيا سابتك تنزل لوحدك من غير ما تمد إيدها ولا حتى تهون عليك السقطة وتلاقي كل حاجة حواليك بتتهد ناس كنت فاكرهم سند طلعوا هشا زي الورق وكلام كنت مصدقه طلع أخف من الهوا واحلام كنت شايلها جوه قلبك اتكسرت من غير حتى ما تأخد فرصتها تعيش وساعتها تحس انك مكشوف ومجرد
ومش لاقي حتى كلمة تطبطب عليك ولا كتف تستند عليه بس تلاقي حاجة أغرب بتحصل تلاقي نفسك بتتصرف مع الوجع كأنه حد جواك بيقول لك قوم شدك وقفك ابني نفسك من جديد حتى لو الدنيا كلها ضدك لان اللي بيطلع من اللحظة دي مش هو نفس الشخص اللي دخل فيها واللي بينجح بعدها بيبقى حد مايتكررش لان الهزيمة لما تعدي على القلب وتسيبه عايش بتسيبه أقوى من
الحديد وتلاقي الليل طويل مالوش آخر ومليان أسئلة مالهاش حل وتلاقيك بتحارب نفسك أكتر ما بتحارب الدنيا وبتفتش في ذكرياتك عن أي لحظة كانت مريحة يمكن تديك نفس تكمل بس بعد شوية تدرك ان اللي فات فات وانك مش محتاج ترجع ورا علشان تتقوى انت محتاج تبص قدام وتكمل حتى لو رجليك بتترعش والقلب تايه ومش فاهم رايح على فين وفي الطريق ده اللي
مافيهوش أنيس تلاقي حاجات صغيرة بتقويك كلمة من حد غريب لمسة أمل من موقف بسيط فكرة قومتك في وقت كنت فاكره انتهى وتبدأ تفهم ان الانسان مش بيكبر بس بالعمر الانسان بيكبر بالوجع اللي فاضل منه حي وبالإصرار اللي مابيقبلش الهروب وبالقلب اللي اتلسع كتير بس لسه قادر يحب ويعطي ويبدأ من جديد وفجأة تلاقي نفسك واقف على رجليك من تاني من غير ما
تحس وتلاقي الانكسار اللي هدمك هو نفسه اللي بناك وتلاقي النسخة اللي طالعة منك أجمد وأهدى وأحكم وتعرف ان كل سقوط كان بيقربك من المكان اللي المفروض توصله مش اللي انت كنت رايح له وان كل خسارة كانت بتشيل من طريقك حد ماكانش يستحق يمشي معاك أصلا ولما تبص للي فات بعد ما تعديه تفهم ان الوجع ماجاش علشان يعذبك الوجع جا علشان يصنعك واللي اتبنى من تحت الصفر عمره ما يخاف من الهدم تاني
