رساله الى كل أب وأم عاوزين يجوزوا ابنهم
بقلم محمد الدكروري
لازم تعرفوا قبل كل شيء إن البنت إللي هتجوزوها ابنكم دي بنت ناس زيكم بالظبط ويمكن أحسن منكم كمان وعايشة في بيت أبوها أو بيت أهلها عيشة كويسه ويمكن أحسن من عشيتكم كمان
فقبل ما تعملوا الأفراح والليالي الملاح ومزيكة حسب الله والرقص والزغاريد والمسرح والكهارب وتجروا في الشوارع تعزموا الناس وتشتروا الفول السوداني والترمس لازم تعرفوا إن البنت دي إللي هتكون مرات ابنكم لها حقوق عليكم بالأصول
لها إنها تعيش في وسطكم عيشة كويسة وتأكل لقمة كويسه وتتعامل معاملة كويسة وتكون ذي بنتكم بالظبط علشان العيشة تستمر بينها وبين ابنكم وبينها وبينكم
أما إللي بيحصل النهارده في مرات الإبن ده ميرضيش ربنا من إنكم تجوعوها وتشقوها وتبخلوا عليها وتشتموها وتهينوها وتبيعوها دهبها وتسلطوا جوزها عليها ينكد عليها عيشتها ويسيبها من غير مصروف وتاخدوا منه فلوسه وتقلعوه ملط بلا رحمة بحجة أخواته أو الظروف الصعبة ده كله فساد وهيجلب فساد
وفي النهاية البنت تطلب الطلاق وتخليكم تجروا في المحاكم وتطلع عنيكم وتفضحكم بين الناس أنكم جعانين وجرابيع وعملتوا فيها كذا وكذا وتنشر كل غسيلكم الوسخ أدام الدنيا كلها وتقول عليكم إللي فيكم واللي مش فيكم من غلبها وكل إللي شافته منكم من قهر وذل وكسرة نفس
وهي برضوا إللي فايزه في الآخر هتاخد كل حاجه ومش هتسيب من حقها حاجه وتسيب ابنكم صايع وضايع بعد ما كان له بيت وزوجه ويمكن أولاد كمان
فاتقوا الله أيها الآباء والأمهات في زوجات أولادكم وعاملوهم ذي بناتكم وأولادكم علشان عجلة الحياة تستمر ويكون في صفا ورضا بينكم وأوعوا تنسوا أنكم كنتم زوج وزوجه في بيت اهاليكم في يوم من الايام وبلاش تعملوا في زوجات أولادكم إللي اتعمل فيكم
ونسأل الله عزّ وجل أن يهدينا جميعا ويصلح حالنا يااارب 🤲
وحسبنا الله ونعم الوكيل في كل أب وأم يكونوا السبب في خراب بيت ابنهم أو دخوله السجن أو تشريدة وضياعة بعد ما كان مستقر وله بيت وزوجه وأولاد..
الكاتب محمد الدكروري رساله الى كل أب وأم عاوزين يجوزوا ابنهم
