اسمي ولقبي سودانية
خواطر أغني الأسواني
الشريف_أحمد عبدالدايم
اسمي ولقبي سودانية
رمز الأســود وفنجرية
عجباني أسوُدْ آنيّـة
ولا فرق بين الجعلية والشايقية
ناس حميدتي حامل قال سلاح
داير ياخد من جناي الركشة
روح ياود الناس وانجشّة
لأطلع من جوفك الكرشة
إياك تفكر تقول
جاهلة صغيرة يادوب
براي اعصرك كـ اللالوب
وادير إيديك جار بقرنا الحلوب
السودانية مهما جار الزمن
تقيف شامخة رغم المحن
شوفعانا بترضع الجسارة
قبل الجبن
لو مات جناي شهيد موتو لينا عيد
دموع ما تفيد لو مدولنا إيد
من النار تصبح قلب الام حديد
لو طفح الكيل تلاقي الكل عنيد
لسّة منكم ما اتفشينا
تبقى الراحة حرمانة علينا
قفانا رجال اسود ركيزة متينة
البطن والكبد ملانة منكم غبينة
نِحنا بكتفك ي البرهان
يحرم الشراب وكمان البُرّ هان
ليّن ترجع سودانّا كما البرهان
والعالم يشهد كيف السودان برهان
اسمي ولقبي سودانية
الشريف_أحمد عبدالدايم
