ولا عاد زي زمان
. . . . . . . . بدرى ابوخزيم
خدنى الحنين للبلد
ولقتنى فايت
جنب عتب
الدار
مديت أديا أسلم
خدتني بالأحضان
فتح البيبان
ياسقف عالي من
جريد النخل و فليق النخل ساند
متغطي بالطين اللي مع السنيين معاند
وحيطان البيت بتبص ومرعياني
وحاضنه زكري حلوه
والنسمه وهواها رباني
بارده وحلوه تشفي العليل
وزير ميته سلسبيل وحلوه تروي مر وبعد الليالي
والعنقريب
الله على الونس
فى ضل حبيب
المزيرة
و الرحاية
المكنسة الجرباح. والظباطه معموله علي الايد
نفس المراجيس والمناطيل ومواجير العجين والخبيز
وصوامع
الغلة
المكحلة ع الحيط
بدلال بتتدلى ولمضه الجاز عليها طاله
ريحة التراب
فى الشارع
المرشوش
صوت العيال
فى الحوش
والراديو سامع
صوته من برا كل ده ومنستوش
قربت ع الأوضة
لقيت جدى
عمال بيحسب
ويكيل الغلة
وطلعت اجرى
على صوت
الخيل واقف من بره نفسه قطعة سكر
………………
المهرة فكت حبلها
كالعاده
والبنت تصرخ
حتدوس على
السجاده
جريت ورا المهره
أتكعبلت رجلى
ليه كل شئ
لساه كما سبته
زمان
الا صحتى وصغرى
خمسين سنه وكل
شئ لساه
عاشق يا مية ف الفحيره
معكره
متعطرة بريحة
الفيضان زمان
لف الزمان ورجعت
أدور ع اللى سبته
زمان. لا لقيت اللي سبته. ولا لقيت اوقات زمان
مات واندفن من زمان
انطفي بابور الجاز واللمبه ملت البنوره هباب
ولا عاد بخيت الغره بيطين حمير
ولا عاد البابور والحله بتطلع ميه زي زمان
ولا عاد وزات عطالله وحسيب بتتخانق زي زمان
ولا عاد الخال صوته يجلجل ياااااعبده زي زمان
ولاعاد مرزوق بيجي علي حمارته زي زمان
ولا عاد الشيخ محمد علي ادم بيأذن زي زمان
ولا عاد ابوعمر بيبيت علي الانفار
واتهدت المسطبه غربه واتفرق الاحباب ومعادش الزمان زي زمان
حتي الجمامات والحمامات الفروجات والظراظير اصواتها اتغير كانها حزينه علي اللي فات
حتي ابوقردان ترك الغيطان وسكتت الغربان
مات السادات. واتولد علي حميده لولاكي
واختفت طايرة الرش ومعادش لطعه ولاحتي قطن بيتجا
والزمان معادش زي زمان
بيت هجت منه الحريم والعيال و
وبناني الحمام اتهدمت لا عاد فيه بناني ولا حمام
طلع علي جريد النخل بينوح علي الايام
كام مره جه وزار لقي الحال هو الحال
ولا عاد زي زمان
