احنا اتقابلنا فين

احنا اتقابلنا فين

طيب… كنت انت وانا 

ولا حكاية سمعتها 

لاتنين تانيين..

بس لما اتحكيت

 تفاصيل ملامحه 

كانت ملامحك تشبه لها.

مش عارفة لية 

حاسة ان بطلة حكايته

تشبه كتير ليا انا..

صوتها واخد من الفجر

 لما يبتدي 

يشبه لصوتي وهمهماتي 

من كسوفي..

وعيونها لامعة تسأل اسئلة

بتحكي خوفها…

زيي انا لما بخاف 

لالبعد يخطفني 

لبلاد اكبر

 من قوة حدودي..

لو دي حكاية لعاشقين 

غيري وغيرك

لية ابقي سامعة

 حواديتهم في ليلك

لية ابقي شايفة

 ضحكتهم في عينك

لا مش موافقة اقتنع …

ان وجودك الليلادي ..

اول لقاء…

ولا كفوفك والسلام 

دي اول بداية ..

يعني ماكانش عهد ..

وراجع تجدده 

بالوفاء…

احلفلي اني مش حبيبتك 

من قرن فات..

وقولي ان الاختلاف 

في الموجدين ..

وانك ما تعرفش اني…

 كل عمري لما بخاف..

مش بطمئن ..

الا لما تضمني 

بعنيك وعيني..

ولا لما كنت اغير

كنت بتقبل جبيني ..

وتقولي …

لما تبقي بنتي ..

حد يقدر يخطف

 من الاب سنينه..؟

ولا لما اعشق جنونك …

حد يقدر

 يقولي اعقل جنوني..؟

انتي بنتي وكمان حبيبتي ..

فيكي كل الدنيا 

ما تكغي حنيني..

مش هصدق ان الكلام دا …

ما قولتهوش …

ولو انت صادق …

قولي …ياللي 

قابلتك في بعدي 

واخدت عهدي 

ووفيت بوعدي… 

احنا اتقابلنا …فييين….؟

                                                       بقلم الشاعرة / هنا السباعي 

احنا اتقابلنا فين