التفاؤل
بقلم :سمر يوسف
التفائل شبه مناعة الجسم كدة ربنا خلقه عشان تقاوم اى هجوم ..ورغم ان اسلحته هشه وضعيفه جداا قصاد اللى بيقاومه
لكن جماله في بساطته .
اللى بتكون في بصّة امل بتقول “يمكن بكرة أحلى”
في ضحكتك اللي بتطلع وسط زحمة وكركبه وهموم بتخلي الناس تستغرب إزاي عندك الرضا ده كله.
في طبطبتك على روحك بدل ما تجلدها، في كلمة “ماشي” اللي بتقولها للحياة اللى بتعاكسك كل شويه ..بس انت تمام وماشى ومكمل ومش زعلان
ومتفائل ان كله هيعدى وهتروق وتحلو
تأثير التفاؤل علينا وعلى اللى حوالينا زي الشمس أول ما تطلع بعد ليل طويل…لا بتحل مشكلة ولا بتغير فى الامر شئ ..
بس بتنوّرلك وبتوسعلك وبتخليك تفكر وتتحرك تانى فى اتجاه تانى بشكل تانى ..واكيد هتظبط ف مرة من المرات
التفاؤل بيخلي الناس تِحب تبقى حواليك، لأنك مصدر أمان. وبهجة وسعادة وبيتفائلوا بيك كمان وبيعتبروك وش السعد وقدم الخير
ودايما التفاؤل مخليك شايف دايما باب هيتفتحلك وسط حيطة سد وانت مصدّق فى كدة ومش همك اى سخرية واحباط حواليك
التفاؤل دة توقيع بختم ملكى .. بإنك اتحطيت فى المكان دة مش صدفة.
من تجاربك اللي عدّت وازاى عديتها اصلا
التفاؤل الحقيقي مش أنك تضحك وتبتسم طول الوقت،
لكن أنك ترفض تستسلم للحزن، حتى لو جايلك بألف شكل ولون
بالتفاؤل، إحنا بنزوّق الواقع…
وبنحط بذرة وردة فوق التراب، ونفضل نرويها بكلمة حلوة، بدعوة، بصبر وبدمعة قدرنا عليها ومسحناها
وابتسمنا تانى وهنفضل نبتسم
التفاؤل مصل مضاد للإنهزام ツ
#يوميات باشمدرسة
#وزيرةالسعادة ツ
التفاؤل
