المصري السوى الشريف
كتب/سعيد ابراهيم
مين هو المصري السوي الشريف؟
هو كل مصرى خايف على بلده بدون حسابات معيشية و لا اي مصالح شخصية.
المصري السوي الشريف ده..
هو اللي يعرف قيمة المشاريع القومية و التطوير و البناء اللي بيحدث في مصر
المصري السوي الشريف ده..
كتير من معارفه و أصحابه قاطعوه…عشان بس كان عاوز أمن و أمان و استقرار مصر.
المصري السوي الشريف ده..
بقاله اكثر من عشر سنين ثابت على موقفه مطرح ما مصر تضعه تلاقيه.. كل ما مصر تقوله حاجة يقولها حاضر.
المصري السوي الشريف ده..
مكنش شاغل باله بـ سياسة و لا حروب الجيل الرابع والخامس.. بس عشان بيحب مصر من غير مصلحة معيشية.. لقى نفسه فاهم يعني إيه دولة و إنها حرب وجود..
مش يعني إيه مصلحتي و بس!!
المصري السوي الشريف ده..
عايروه بفقره.. و عايروه إنه ضد الدين.. و عايروه إنه بيطبل.. و مارسوا ضده كل أنواع التهميد المعنوي..ورموه بالجنون وإنه مش عايش على الأرض معاهم..و دخلوا معاه في رهان إنه ماشي غلط و بيدعم راجل فاشل ودولة فاشله.
المصري السوي الشريف ده..
أقل واحد إستفاد من أي مميزات منحتها الدولة و من أي مشروع نفذته الدولة.
عينه على حاجة واحدة بس.. أمنها وأمانها و استقرارها وخوفه على البلد أكتر من خوفه على عياله.
المصري السوي الشريف ده..
فى 2011 مقالش يسقط حكم العسكر.. و لا حدف طوبة على منشئة عامة أو خاصة وكان قلبه بيتقطع من خوفه على البلد
فى 2012 و 2013 معصرش لمون و جاب مرسي العياط.
المصري السوي الشريف ده..
فى 2014 قال للسيسي انزل و قفش في بدلته العسكرية و مسبهاش غير لما دخله القصر الرئاسي.. و مع كل قرار مفيش مرة قال مش وقته و لا ياريتني ما انتخبتك.
المصري السوي الشريف ده..
مع كل كارثة تحصل في أي دولة.. تلاقيه اول حاجة بيقولها الحمد لله على نعمة جيش مصر.
المصري السوي الشريف ده..
خسر علاقات.. اتريقوا عليه..دخل في مناقشات كل الكلام فيها عن الانقلاب و الغلاء و هنموت من الجوع.. بس كان سابقهم كلهم بسنين طويلة و مباصش تحت رجله.. و النهاردة يكفيه نظرات البعض اللي بتقول انت كنت صح.. او اتكتموا بعد ما فرمناهم السنين اللي فاتت و ربنا خذلهم في كل توقعاتهم لفشلنا.
المصري السوي الشريف ده..
مكنش طمعان غير في أمن وأمان و استقرار.. بس ربنا كرمه بدولة عملت في سبع سنوات اللي مفيش دولة تقدر تعمله في خمسين سنة..
و ربنا كرمه بدولة و هي بتحارب.. عملت مستقبل محترم للأجيال الجاية و اللي بعدها..
المصري السوي الشريف..
هيقف ادام ربنا يقوله انا حافظت على أمانة مصر.. أمانة البلد المفضلة عندك و عند آل بيت رسول الله.
#حفظ_الله_مصر
المصري السوى الشريف
كتب/سعيد ابراهيم
