شعر/احمد عبد الرازق الزعويلي
بحلم بليلة دفا
يا دنيا ظلماني
تاهت معالم سكتك
تاهت حروفي وعنواني
اديت لغاية الكفا
ما خدت غير نكراني
يا ام ليه بتفرقي
في الحضن بين اولادك
بتطردي من حضنك عاشق
وتحضني اللي جري وسابك
ماهو احنا كلنا منك
وانت التراب اللي بنعشقه جنابك
اديني يوم حضن دفا
تلاقيني كل يوم علي بابك
معدتش عارف ان كنت منك
ولا لقتيني لقيط علي اعتابك
مال بالمغرفة ومفيش جفا
للي ما بكي يوم علي مصابك
وقوت لنموت وبالسحتوت
للي شال طينك وترابك
بحلم بيوم العدل يا فاروق
دنيا الجباية رايجة لها سوق
والدم نشف في العروق
اصحا يا حجاج
كدا وفوق
بحلم بيوم شعاره اية
العدل يعلا ويعلي لفوق
شعر/احمد عبد الرازق الزعويلي
بحلم
