حدوته في سطر

حدوته في سطر

إحنا مايتراهنش على هزيمتنا ..
في ناس اترمت فى النار ومااتحرقوش..
عاشوا وسط دخان الخساير، وطلعوا منه سالمين غانمين ماتخنقوش.
ناس اترسمتلهم النهاية 100 مرة، وكل مرة يقوموا من تحت الرماد ينفضوا هدومهم ويكملوا عادى وجواهم أمل ما بيموتش.
إحنا مش من الناس اللي الدنيا خدتنا براحة و علمتنا بالعقل وبشويش لأ..
إحنا إتشكلنا بالحزن، والوجع، والدنيا شالت وحطت فينا وعلينا.
إحنا اللي خسرنا ففهمنا… ووقعنا، واتعلمنا.
ولما بنقوم، مش بنقومها مشي…إحنا بنقومها طايرين ولا فارق معانا ..
واللي بيقوم مرة ..ما بيخافش يقع تاني.
إحنا اللي اتخذلنا وكملنا
إحنا اللى اتحبينا غلط واتجرحنا صح الصح ..ومهمناش ولسه بنحب نفسنا ومقدرينها..
إحنا اللي لما الدنيا هزمتنا في جولة،شيلنا نفسنا ومشينا مجرجرين خطواتنا مستنيين الجولة اللي بعدها.
كل واحد فينا جواه حدوته انتصار، محدّش شاف كواليسها..
محدّش شاف الليالي الطويلة اللي بكينا فيها، وسهرنا وقولنا
“يا رب، أنا مش قادر، ساعدني وقوّيني..
ولا النهار اللي طلع علينا وإحنا “مش قادرين”..
اللي جرّب الضلمة، هو أكتر حد يقدّر قيمة النور.
واللي اتوجع من الناس، هو برضه أكتر حد بيحس بيهم.
واللي قام مرة واتنين وعشرة، مستحيل يستسلم.
فلو حد راهن على هزيمتنا، ياريت يراجع الرهان.
إحنا ولاد الألم بس مش ضحاياه.
إحنا اللي نجينا منه بإيماننا وصبرنا
اللي يراهن على هزيمتنا، نحب نقوله:
إحنا اتخلقنا عشان نعدّي الغدر والظلم والخذلان ونصبر ونحتسب.
اتخلقنا نعدّي ونضحك وإحنا مش تمام،
اتخلقنا نعدّي ونواسي وإحنا عاوزين اللي يواسينا،
نعدّي ونفهم إن اللي فات كان لازم يحصل عشان نشوف اللي جاي بعقل واعي.
إحنا بقينا أمل لناس تانية كل ماالدنيا تسْود فى وشهم يشوفونا ويقولوا “زي ما همّا عدّوا.. إحنا كمان هنعدّي.”
اللي قالوا: “مش هيكملوا”؟
أدينا كملنا.
واللي قالوا: “هيستسلموا”؟
أدينا قاومنا.
واللي قالوا: “مش هينجحوا من غير سند”؟
أهو سندنا اللي فوق واللى احسن من اى حد ☝️.
أحب أقول للي بيراهن على هزيمتنا:
إحنا مش لابسين دروع حماية،
إحنا بنواجه بستر ربنا.
واللي ربنا سَاترُه ، عمره ما ينكسر أبدًا.
#يوميات_باشمدرسة
#وزيرةالسعادةツ
26_5_2025