زجل قصيد باللهجه العاميه اللبنانيه
……………
إجا أيلول
…………..
إجا أيلول يا أرض شلحي
ثوبك لكنتِ فيه مسلحي
اليوم انتهى غرورك ودلالك
من حُسن جمالك ما بيستحي
هاجم أيلول على جمالك
زهوة شبابك بدها تنمحي
بدو بأرضك يشرد عيالك
ومن زرار الورد ما تنفحي
أديش الحسون عالغصون غنّْالك
وأنتِ عاحبال لحنو تتمرجحي
وترقصي وتفردي جدايل حبالك
بفخر وغوى حسنك تفضحي
وتغزلي للصباح شال بمغزالك
وعافرشتك ينطق لسان الوحي
اليوم مرمغ دلالك حلالك
شهر أيلول حلاق اللحي
ياما وشوش لساني وحكالك
تعي تكني بعطف مشلحي
ما كنتِ ترضي بقيتي لحالك
بدك تشربي بكفوفك دموعك
وغير سكت الفلاح ما بتربحي
………… …………
بقلم الأديب والشاعر يوشع علي إسماعيل
زجل قصيد باللهجه العاميه اللبنانيه
