سنين الغلاسة عند المراهقين … أعراض وحلول
متابعة نشوى شطا
مرحلة المراهقة هي مرحلة انتقالية بين الطفولة والرشد، وتُعد من أهم المراحل العمرية التي يمر بها الإنسان، حيث يتعرض فيها المراهق لتغيرات جسدية، نفسية، واجتماعية كبيرة. وتختلف بداية هذه المرحلة ونهايتها من شخص لآخر، لكنها غالبًا ما تبدأ من سن 12 إلى 19 عامًا. في هذا الموضوع، سنتناول خصائص هذه المرحلة، التحديات التي يواجهها المراهقون، ودور الأسرة والمجتمع في دعمهم.
يؤكد استشاري العلاقات الأسرية و الزوجية دكتور عبدالله أحمد مرحلة المراهقة هي المرحلة اللي بيبدأ فيها المراهق يتصرف بطريقة مستفزة أحيانًا، بيكون عنده اعتراض على كل حاجة، وبيبقى حاسس إنه فاهم كل حاجة أكتر من أهله. المرحلة دي طبيعية جدًا وبتحصل بسبب التغيرات الهرمونية والنفسية اللي بيمر بيها، وكمان بسبب رغبته في الاستقلال وإثبات نفسه.
ويوضح دكتور عبدالله أحمد أعراض الغلاسة عند المراهقين:
1. الردود المستفزة والمبالغة في النقد: ممكن تلاقيه بيرد بطريقة جافة أو ساخرة على أي كلام، حتى لو كان بسيط.
2. العناد والتمرد: بيعترض على القواعد بشكل متكرر، ويحاول يفرض رأيه حتى لو كان غلط.
3. التقليل من آراء الأهل: بيحس إنه فاهم الدنيا أكتر من أهله، وإنهم قدامُه “مش فاهمين حاجة”.
4. التذمر المستمر: سواء عن الدراسة، البيت، أو أي مسؤوليات، دايمًا حاسس إنه مضغوط وإنه الوحيد اللي بيعاني.
5. التصرف وكأنه لا يهتم بأي شيء: حتى لو كان الموضوع مهم، ممكن يظهر لامبالاة عشان يبين إنه مستقل.
6. الرغبة في العزلة أحيانًا: بيقضي وقت طويل في أوضته، مع السماعات في ودنه، أو على الموبايل.
7. تقليد الأصدقاء أكتر من الأهل: ممكن تلاقيه بيتبنى أفكار أصحابه أكتر من كلامك، حتى لو كانت غلط.
ويشير دكتور عبدالله أن هناك تحديات لمرحلة المراهقة يواجها المراهقون، منها:
1. الصراع بين الاستقلال والاعتماد على الأسرة: يرغب المراهق في الحرية، لكنه لا يزال يحتاج إلى دعم عائلته.
2. ضغوط الدراسة والمستقبل: يشعر المراهق بالقلق تجاه التحصيل الدراسي واختيار مستقبله.
3. التعرض للتنمر أو التأثير السلبي: قد يواجه بعض المراهقين تنمرًا من الأقران أو ضغوطًا لتجربة أشياء خطيرة مثل التدخين أو المخدرات.
4.اضطرابات الصحة النفسية:مثل الاكتئاب والقلق، خاصة مع ضغوط التواصل الاجتماعي والمقارنة بالآخرين.
وبسؤال دكتور عبدالله إزاي أتعامل معاه ؟!!
يجيب قائلاً أن هناك أمور لازم تاخد بالك منها كأب أو أم مهمه جدا هسردها في مجموعة من النقاط :
1. ما تخدش الأمور بشكل شخصي: الغلاسة دي مش ضدك، لكنها جزء من تطوره النفسي، فحاول تتعامل بهدوء ومتضايقش.
2. سيب له مساحة شخصية: المراهق محتاج يحس إنه مستقل، فمتضغطش عليه إنه يتكلم أو يقعد مع العيلة غصب عنه.
3. اتكلم معاه بدون أوامر: بدل ما تقوله “لازم تعمل كذا”، جرب تخليه يحس إنه بياخد القرار بنفسه.
4. تجنب أسلوب السخرية أو التوبيخ: لو اتريق عليه أو انتقدته كتير، هيزيد في العناد وهيبعد أكتر.
5. خد رأيه بجدية: لما يعبر عن رأيه حتى لو كان غريب، ناقشه باحترام عشان يحس إن صوته مهم.
6. حافظ على هدوئك: لو رفع صوته، حاول تفضل هادي، لأن الغضب هيخليه يتمسك برأيه أكتر.
7. حدد حدود واضحة لكن بدون ديكتاتورية: لازم يبقى فيه قواعد في البيت، بس تتناقش معاه فيها مش تفرضها عليه.
8. اهتم بعلاقته مع أصدقائه: لو صحابه كويسين، هيكونوا مؤثرين عليه بطريقة إيجابية، فحاول….. تبقى عارف هو بيقضي وقته مع مين.
ويختتم استشاري العلاقات الأسرية و الزوجية حديثه باختصار، المراهق… مش بيكون غلس عن قصد، لكنه بيمر بمرحلة معقدة بيحاول يكتشف فيها نفسه. كل ما تعاملت معاه بصبر وتفهم، كل ما المرحلة دي عدت بسلاسة بدون مشاكل كبيرة…..
سنين الغلاسة عند المراهقين … أعراض وحلول
