سنين عمري
عادل محمود
سنين عمري يا منسية بطبق كشري وشوية تقليه
وخمسينة علي القهوة وعٓشرة طاوله علي سهوة
وسلم بيت يهد الحيل
وقلب حزين و شايل شيل
وهم كتير و حمل تقيل
وحظ و بخت مايلين ميل
سنين عمري يا منسية علي المكتب و مكفية
ودة صادر وده وارد
وده دفتر غياب وحضور
وسارقة مني أيامي وحبساني ورا ١٠٠ سُوَر
وحتي ف شِعري عملاني انا الفاعل لكن مكسور
سنين عمري يا منسية بتجري ليه
يكونش في وراكي ميعاد ؟ قوليلي عليه
وانا أحلق دقني و اتأمع و اسرح شعري و اتلمع
و أرَكب ضحكة ع الخدين و أقوم البس عشان خارجين
سنين عمري يا منسية و نسياني
كأنك مش سنين عمري سنين عمر واحد تاني
ما تهدي عليا وتحني وشيلي الحمل ده عني
