علم النفس العكسى
مقال بقلم / رانيا البدرى
هو عبارة عن مجموعة من الحيل النفسية ممكن شخص يمارسها ضدك ، فإحذرها
الحيلة الأولى
أنه يكلمك دايماً عن ظروفه الصعبة أو يقولك
أنه شخص سيء و مينفعش حد يقرب منه أو يشاركه في أى حاجة !!
هو هنا بيعمل دة لهدفين / اولا بيلعب على حتة التحدى جواك ( خاصةً لو أنت شخصية متعاطفة ) فهتقول لنفسك انا هثبت له إن الدنيا لسة بخير و فيه ناس طيبين .
ثانياً أن مع أول خلاف بينكم هيفكرك أنه حذرك من القرب منه فهيكون اللوم عليك دايماً
هنا ممكن حد يشوف دة صدق و وضوح !!
هو اكيد مش كدة لآن الإنسان الصادق لو عارف فى نفسه صفات سيئة مش هيحاول يقرب من حد أصلاً و هيشغل نفسه بإصلاح ذاته أولاً .
الحيلة التانية
لأن المتعارف عليه هو مدح شخص و ذكر مميزاته للتقرب منه … هو هيعمل العكس تماماً فممكن تلاقيه بيذكر كتير عيوبك أو ينتقدك أغلب الأحيان و بعدين يقولك حاجة واحدة كويسة فيك هنا هو بيوصلك أنه صريح و مش مجامل
بالتالى بيكسب ثقتك .
الحيلة التالتة
لو بتتكلم معاه و لقيت مجموعة شكوك بتدور فى دماغك حواليه . هتتفاجىء أنه بيواجهك باللى بتفكر فيه بالظبط سواء قال دة بجدية أو هزار ، هو هنا بيكسفك قدام نفسك عشان ظنيت فيه و انت بتعتقد أنه قاريك اوى و فاهمك لكن الحقيقة هو لا فاهمك ولا حاجة ، كل الحكاية إن ظنك فيه فى محله .علم النفس العكسى
