قصيدتى
سيبنى ف حالى
بقلم /
خيرى ناصف khayry nassef
طب قوللى جايِّى فى إيه
وعايزنى ليه يا جميل .
إياك فاكرنى يا بيه
باستنى قلبى يميل .
من بعد سُهدى وسهرى
ودموع فى نص الليل .
بأحلم واصَبَّر نفسى
وعامللى فيها تقيل .
سيبنى أما اراجع قلبى
ما هو داق معاك الوِيل .
ما أنا لازم أخد حقى
مش قادرة ع التمثيل .
جايز ويمكن أرجع
والحُكم نُص الليل .
نسيت الليالى بادمَّع
وباغرَّق المناديل .
ركز يا شاطر واسمع
أنا أصلى صبرى قليل .
لو ناوى قلبك يوجع
ويخللى قلبى يشيل .
لأ روح وسيبني أدمع
وسيب لى هَمْ تقيل .
أنا عارفة بختى مِرَقَّع
والحزن عندى أصيل .
خلينى اعيش موَّالى
من غير جروح يا جميل .
ممنونه لو تنسانى
وتسيب لى قلبى عليل .
وإياه يفكر تانى
يحب والاَّ يميل .
وامسح كمان عنوانى
وكفايه منك وِيل
