(قصيدة)
_______(مش.. مسامحك)
**************
بحق كل كلمة بنا مش مسامحك.
بحق القلم اللى وصفت بيه ملامحك..
مش مسامحك…
تشهد ساعات قلة راحتى ف نومى.
قد إيه كان حبى ليكى وقت ماكنتى تصومى؟!
عن الكلام…
كنت أقول سيبها وماله يمكن عايزه تنام.
ماانت بتصدع دماغها بالكلام!!
وأقول لروحى.
لما كنتى بتسيبيها بالساعات ماتزعليش.
أصلها من عشقها ليكى بتحب تعيش..
على صوتك.!
زاهده ف كل شئ إلا إنها تفوتك؟!
متعلقه فيكى حتى ف لحظة سكوتك؟!!
كانت تطير من الفرح بكلمة حلوة منك!
ساعة ماتسمع ضحكتك كان ضحكها يجنك!!
والا
نسيتى لما كنتى بتقوليلى فين ضحكتك؟
دى عينيك جميلة بتبان فيها إبتسامة نظرتك؟!
النهارده جايه تنهى كل شئ مابنا؟
بتعذبينى بنار فراقك وحرمانى من الجنه؟؟
طيب إستنى لما تظهر منى عيبه.
كنت قلت من حقها مش غريبه!!
ما انت السبب إنها تسيبك.
مافيش كلمة حلوة،ولا حتى ورده ف إيدك..
ولا وحشانى ولا بتسمع نبض وريدك!!!
ماكنتش زعلت من نفسى لما راهنت عليكى.
ساعة ماجتلك وحطيت قلبى ما بين إيديكى!!
يومها قالتلى السعادة و الأمان هما فيكى!!!
فاالحياة مدرسة بتعلم وأنتى الحياة،
اللى علمتنى الجمود والبرود ف المشاعر من عينيكى!!!!!
مش.. مسامحك كلمات
فتحي ابو طاحون
8/9/2023
