يا أخويه وسندى
يا أخويه وسندى
بقلمى
خيرى ناصف khayry nassef
الحكايه أكيد يا فندم النفوس
اتغيرت مبقتش هيه .
طُظ جدا فى التقدم و الفلوس
أصل البَلِّيه .
بكل قسوة أخوك يدوس
صعب يعنى جديد عَليَّه .
ياما لَقَّنا الدروس والنتايج
للأسف بقى هيه هيه .
عمرى ما اتوقعت فعلاً
تِتوِجد بينا الأسيه .
لما الفرحه تملى قلبك
الأكيد بيبان عليك .
وأما غِلَّك ييجى فاضحك
هتخبى فين نظرة عينيك .
بِعت قُربى بالرخيص
وبالغالى انا مِشتريك .
ليه نسيت إن إنت لَحمى وإن
حبى ملوش شريك .
ليه بتنسى يا بن أمى إن حُضن
أخوك سكن و مأوى ليك .
لو يِميل بيك الزمن أو
تدور الدنيا بيك .
إفتكر أيام زمان كنت الأمان
والدراع اللى حاميك .
وانى نار لهيبها يحرق
وِشْ كل اللى يعاديك .
وإن بيت أبونا شاهد
وأُمِنا اللى بتدعى ليك .
بادعى ربى بالهداية ويخزى
كل شيطان غاويك .
إوعى تنسى لَمِّت العيله
وِسط أفراحنا الجميله .
لما ابوك تِعب وضيع من حياته
عشان حياتنا سنين طويله .
وكلِ أَملُه يشوف وِلادُه
وِلاد أصول وأحلى عيله .
وأما نتجمع مع امك ويا أكله
بكلِ حب وتبقى ليله .
لما كان بييجينا زنقه وكلنا
ملناش وسيله .
غير حضن ابونا وامنا اللى
لامم شملنا ونشيلها هِيله .
إخيه على الأيام اللى جَدِت
وجات مُرَّة وتِقِيله .
معقول نسيت اللى ما بينا
ف زحمة الدنيا الثَقيلة .
أخويه يا ضهر وسند وإنت
اللى لِيَّه ف دنيتى .
ياللى بيك تِكمل حياتى وجنب
منك أعيش سعادتى و فرحتى .
ماتقوللى مين كان السبب
يا نبض قلبى وعِزوتى .
ياللى سِيبت أخوك العصب
وحيد و تاهت سِكتى .
خليتنى اقول يالا العجب
ع اللى باع مَحبِتى .
دا البعد عنك نار وآيده
و شئ مُخيف .
إفتكر وبدون مُزايده لما كنا
نِقتِسم نُص الرغيف .
وأما نمشى بدون مناهده يد
واحده فى الطُرُق جنب الرصيف .
واوعى تنسى إننا أرواحنا واحده
وإننا فى الأصل ريف .
الأُخُوَّة عمرها ما كانت فى
التاريخ من نور ونار .
الأُخُوَّة والكلام واضح صريح
نور ينور ليل نهار .
الأُخُوَّة عمرها أبدا ما كانت
ضعف خالص و إنكسار .
الأخوة يعنى قوة مش سواد
قلوب طافح مرار .
معقول وَصلنا للزمن اللى فيه
الأخ زَيُّه زَى جار .
إخيه على خِلفة جابت لاهلها
خيبة أمل كبير وعار .
إرجع لعقلك يابن والدى
وانتبه وخُد قرار .
وافتكر لما كان بيلِمِّنا باب
خشب وصحن دار .
