مخالفات جسيمة في مطعم شجرة الدر.
خالد شكري
مخالفات جسيمة في مطعم شجرة الدر.
في ضربة قاضية مدوّية، تمكّنت الأجهزة الرقابية من كشف الستار عن مخالفات جسيمة داخل مطعم “شجرة الدر”، مما يؤكد يقظة الجهات المعنية في مواجهة الفساد الغذائي بلا تهاون.
وفي سياق متصل، بنشر تحقيقات النيابة حول المخالفات داخل المطعم وهي كالتالي:
س: ما أسمك
ج: «ع.ع.ي»
س: السن
ج: 60 عاماً
س/ ما مهنتك ؟
ج/ طباخ – أنا مدير مطعم شجرة الدر
أحمل تحقيق شخصية رقم ؟؟؟؟؟؟؟
س: منذ متى تمتهن المهنة سالفة الذكر؟
ج: انا مدير مطعم شجرة الدر من سنتين تقريباً لأن انا أصلاً كنت شغال في نفس المطعم في السعودية والمالك للمطعم ده الأستاذ: «ه . أ» بس هو مقيم في السعودية
س: من أين يتحصل مطعم شجرة الدر على اللحوم التي تقوم بتقديمها من المواطنين؟
ج: احنا بنجيب اللحوم بتعاتنا حية من المزارع وبنروح ندبحها في المسلخ وبيدونا اذونات الدبح
س: من مالك مطعم شجرة الدر؟
ج: الشركه ملك الأستاذ «ه . أ» وهو مصري الجنسية لكن مقيم في السعودية
س: من القائم على إدارة مطعم شجرة الدر الكائن مقره بالتجمع الخامس؟
ج: انا اللي قائم بالإدارة في المطعم
س: هل كنت متواجد حال وصول موظفي مديرية الطب البيطري بمحل الواقعة؟
ج : ايوا
س: هل من ثمة حوار دار بينك وبينك المدعوة: «س» والمرافقين لها؟
ج: لا
س: ما الذي قامت به سالفة الذكر والمرافقين
ج: هي جت ومعاها ثلاث دكاترة تانين وسواق بعربية المديرية ودخلوا على الثلاجات على طول وقعدوا يفتشوا راحوا عملين محضر لحوم مكدسة وغير معلومة المصدر وكانت الكمية اللي هي كنا مضينها على سبيل الأمانة على ذمة المحضر ده هي حوالي 2 طن و 800 کيلوا لحمة الحوم وكبدة وحمام وسمان وانا مضيت على المحضر ده بإعتباري المدير المسئول وبعد كدة الدكتور «س» والناس اللي معاها ركبواالعربية ومشيوا
س: هل تقابلت مع سالفة الذكر أو اياً من المرافقين لها عقب ذلك ؟
ج: ايوا
س: مع من تقابلت تحيداً؟
ج: تقابلت مع الدكتور «س» لوحدها
س: ما ظروف هذا التقابل؟
ج: الدكتورة «س» جاتلي المطعم لوحدها
س: متى تحديداً تقابلت مع سالفة الذكر؟
ج: بعد ما عملتلي المحضر بأسبوعين
س: كيف تقابلت مع سالفة الذكر؟
ج : هي جت المطعم وسألت عليا فالموظفين ندهولي تعالا كلم الدكتورة «س» فانا روحتلها
س: هل من ثمة حوار دار فيما بينك وبين سالفة الذكر؟
ج: ايوا
س: ما مضمون ذلك الحوار؟
ج: هي قعدت معايا وقالتلي ان المطعم كويس وانها مبسوطة من مستوى النضافة ومستوى الأمان وانا مبسوطه جدا بده واحنا عايزين نقلل التكدسات بتاعة اللحوم شوية قولتلها حاضر يادكتور نقللها وقالتلي انها هتيجي كل فترة تشرف علينا علشان تعرف احنا مظبطين اللحوم بتعاتنا صح او لا وياريت لو نقدر نساعد بحاجة فقولتلها تحت أمرك يادكتور قولتلها انت عايزة ايه قالتلي فلوس قولتلها يعني كام قالتلي مبلغ قولتلها كام بالظبط قالتلي في حاجة تقديرية منك انت وشوف، قولتلها يادكتور انا بقالي فترة في السعودية ومش فاهم النظام في مصر ماشي ازاي قالتلي طيب بص في ناس ممكن تدفع 5000 أو 6000 كل شهر قولتلها، مفيش مشاكل يادكتور 6000 جنيه في الشهر قالتلي اوكي، وقعدت في المطعم عندي تشرب شوية مشروبات، وبعد كدة جبتلها الفلوس في ظرف وخدتها ومشيت وبعد كدة بقت كل شهر تيجي المطعم عندنا تاخد مني 6000 جنيه ومن ساعة معملت المحضر ده معملتش محاضر لينا تاني وكانت تغيب تغيب وتيجي لوحدها كدة تخش على الثلاجات وتعمل نفسها بتفتش دقيقتين كدة وتطلع تمشي.
س: هل طلبت منك المدعوة: «س» ثمة مبالغ مالية؟
ج: ايوا
س: ما سبب ذلك؟
ج: علشان متعملناش محاضر للحوم والدجاج
س: هل قبلت منك المدعوة «س» مبالغ مالية مقابل ما تقدم؟
ج: ايوا
س: هل من ثمة اتفاق بينك وبينها بشأن مدة حصولها على تلك المبالغ المالية؟
ج: ايوا
س: متى كانت المدعوة «س» تتحصل منك على المبالغ المالية؟
ج: كانت بتيجي تاخد الفلوس في الأسبوع الأول من كل شهر.
س: ما مقدار ما كانت تتحصل عليه المدعوة: «س» في كل شهر؟
ج: حوالي 6000 جنيه
س: مع من تتحصل سالفة الذكر على تلك المبالغ؟
ج: كانت بتاخدهم مني
س: كيف كانت تتحصل عليهم سالفة الذكر؟
ج: هي كانت بتيجي الأسبوع الأول من كل شهر تقعد في المحل وبترن عليا وانا بجهزلها الفلوس في ظرف وادهملها واحيانا كانت بتكون في عريبتها ويبعتلها حد من العمالة بالفلوس تاخدهم وتمشي
س: هل كانت تتحصل المدعوة «س» على منافع او عطايا عينية او نقدية أخرى غير ما تقدم؟
ج : ايوا
س: ما طبيعة ما كانت تتحصل عليه سالفة الذكر؟
ج: كانت بتاخد حاجات تاكلها من المطعم زي شربة او ملوخية وتمشي على طول
س: هل كانت سالفة الذكر تدفع قيمة تلك المأكولات؟
ج: لا هي كانت بتاخد الحاجه تيك اوي وتمشي على طول
س: هل كانت سالفة الذكر تعرض قيمة دفع تلك الماكولات عليك أم لا؟
ج: هي مكنتش بتعرض أصلاً هي كانت بتاخد وتمشي
س: ما سبب قيامها بذلك؟
ج: على أساس ان هي بتحمي المطعم ده من عمل المحاضر
س: هل كان من الاختصاص المدعوة «س» عمل محاضر خاصة باللحوم والمنتجات الموجوده داخل مطعم شجرة الدر؟
ج: ايوا
س: كيف وقفت على ذلك؟
ج: علشان هي دكتورة بيطرية تبع الطب البيطري فرع القاهرة الجديدة
س: كيف وقفت على ذلك؟
ج: علشان هي لما افتتحنا المطعم ومعاها لجنة من الطب البيطري وهي كانت رئيسة اللجنة وعملتلي محضر ب 2 طن و 800 كيلو لحوم بدون فواتير
س: بما وعدتك المدعوة «س» عقب طلبها منك لمبالغ مالية شهرية واستجابتك لها؟
ج: هي وعدتني انها متعملناش محاضر ثانية وان هي تغيب شوية كدة وتيجي تبص على الثلاجات بصة عالماشي وتمشي وانها متفحصش جودة اللحوم ولا تواريخها
س: هل نفذت المدعوة «س» ما وعدتك به من عدم تحرير محاضر اعمالاً لسلطتها الرقابية على مطعم شجرة الدر؟
ج: ايوا هي محررتش محاضر خالص
س: ما وسيلة تواصل المدعوة «س» معك؟
ج: عن طريق التليفون بتاعي
س: ما هو رقم هاتفك الخاص؟
ج: ؟؟؟؟ ومعايا رقم تاني بس مش بستخدمه
س: منذ متى معك الهاتف سالف الذكر؟
ج: الرقم ده معايا من اكثر من سنة تقريباً
س : هل تم فقد الرقم سالف الذكر خلال تلك المدة؟
ج: لا
س: هل يستخدم أحد غيرك الرقمي سالفي الذكر؟
ج: لا
ملحوظة: حيث قمنا بفحص الحرز المرفق بمحضر الضبط للماثل امامنا عقب التأكدة من سلامة اختامة وصحة بياناته فألفينا عبارة عن مظرف بيج اللون متوسط الحجم بداخله هاتف محمول ماركة أبل، وبالبحث في الأسماء تبين لنا تسجيل المدعوة باسم دكتوره «س» الطب البيطري على الهاتف ؟؟؟؟ تمت الملحوظة
س: هل تحصلت سالفة الذكر على هاتفك الخاص
ج: ايوا خدت رقم تليفوني وسجلتني عندها
س: ما سب تحصلها على رقم هاتفك الخاص؟
ج: عشان تتواصل معايا علشان تاخد الفلوس بتاعاتها
س:من الذي طلب الهاتف منكما أولاً؟
ج: «س» هي اللي طلبت مني الأول رقم تليفوني
س: ما مجمل ما تحصلت عليه المدعو: «س» منك؟
ج: هي بقالها سنة وشهر بتاخد كل شهر ٦٠٠٠ الاف جنيه
س: ما اجمالي ما تحصلت عليه المدعوة «س» خلال المدة آنفة البيان؟
ج : حوالي 78000 ألف جنيه
س: هل تحصل أي من القائمين بتحرير المحضر والمرافقين للمدعوة «س» علي ثمة مبالغ أو هدايا أو منقولات؟
ج: لا
س: هل طلب أي منهما شيئاً مما تقدم؟
ج: لا
س: من المستفيد تحديداً من حصول المدعوة «س» علي المبالغ المالية والمنقولات؟
ج: «س» وحدها
س: كيف وقفت علي ذلك؟
ج: لأن هي اللي كانت بتاخد الفلوس مني ومكنش حد معاها
س: ما قصد المدعوة «س» من حصولها علي تلك المبالغ والمنقولات؟
ج: قصدها الاخلال بوظيفتها وان هي متعملش محاضر تخص المحل بتاعنا
س: كيف أخلت سالفة الذكر بمقتضيات وظيفتها؟
ج: امتناعها عن عمل محاضر بالمخالفات الموجودة في المحل
س: ما مقابل تحصل سالفة الذكر على تلك المبالغ المالية والمنقولات؟
ج: علشان متعملناش محاضر ضد محل شجرة الدر
س: هل تم تحرير محاضر أخري من مديرية الطب البيطري فرع القاهرة الجديدة؟
ج: لا
س: ما سبب ذلك؟
ج: علشان احنا مظبطين الدكتور «س» والي بتعوزه بنعملهولها والي بتتطلبه بتاخده كل شهر
س: هل تاجرت المدعوة «س» بوظيفتها؟
ج: ايوة
س: ما مظاهر هذا الاتجار؟
ج: علشان هي من ساعة ما عملت المحضر الأول واتفقنا على فلوس شهرية بطلت تعمل محاضر
ملحوظة: حيث قمنا بعرض التسجيل الصوتي رقم ۲۰٤٩١٣٩٦ (۱) تبين ان مدتها (٢:٢١ ثانية) وهي محادثه بين رجل وامرأة على الماثل امامنا والموجودة على الأسطوانة رقم ٢ المقدمة من هيئة الرقابة الإدارية فأقر بوجوده الى جانب المدعوة «س» حال تواجدها بمطعم شجرة الدر الخاضع لإدارته وانها كانت تقوم بمهاتفة شخص يدعى الدكتور «س»تأسيساً على كونه زميلاً لها بذات محل العمل وهو الطب البيطري فرع القاهرة الجديدة تمت الملحوظة
س: ما صلتك بالمدعو «س» الذي كانت تخاطبه المدعوة «س» بالمكالمة سابقة العرض عليك؟
ج: انا مشفتهوش قبل كدة لكن «س» كانت عايزة تعرفه عليا
س: ما سبب رغبة المدعوة «س» في التعارف وبينك وبين المدعو «س»؟
ج: بصراحة معرفش ممكن علشان هو زميلها
س: هل طلب منك المدعو «س» ثمة مبالغ مالية او عطايا عينية على غرار ما كانت تتحصل عليه المدعو سامية؟
ج: لا
س: هل كان المدعو «س» على علم بما تتحصل عليه المدعوة «س» من مبالغ مالية؟
ج: معرفشس
هل تقابلت مع المدعو «س» من قبل؟
ج: مشفتوش قبل كدة ومعرفهوش
س: ماذا يعني حديث المدعوة «س» عن الاستيكرات الخاصة باللحوم والتي أشارت إليها خلال حديثها مع الدكتور «س»؟
ج: الاستيكرات دي سبب حديث «س» عليها مع «س» انها وانا قاعد معاها اليوم ده سألتها سؤال مهم بـ بشأن ان انا في لحوم عندي السمان انا يجيبه من شركة ومدون عليه كل البيانات الخاصة به من اسم الشركة وتاريخ الإنتاج وتاريخ الصلاحية لكن الحمام هو اللي بيعزبني شوية لأن انا مفيش شركة معينة بتقدر تديني الكمية الكاملة فيضطر اجيب من تاجر ٥٠ جوز حمام وتاجر أخر . ٤٠ جوز حمام ومزرعة ٥٠ جوز حمام والحجات دي معلهاش استيكرات زي السمان فانا كنت بسألها أظبط الحمام ازاي على غرار السمان علشان لو حد جه يفتش عندي فكان ردها عليا ان في شركات بتبيع الاكياس عليها الاستيكرات مطبوعه والاكياس دي بتكون فارغة فأنت تشتري الاكياس بالاستيكرات فارغة وتحط فيها الحمام اللي عندك وبكدة يكون الحمام زي السمان ليه اسم الشركة وتاريخ الإنتاج وتاريخ الصلاحية
س: هل تحدثت مع المدعوة «س» بشأن المحضر الذي قامت بتحريره لك من قبل رفقة لجنة الطب البيطري والتي سبق الإشارةاليها؟
ج: ايوا
س: ما مضمون ذلك الحوار؟
ج: هي قالتلي انه خلاص المحضر خد طريقة وهو في حوزة النيابة
ملحوظة: حيث قمنا بعرض التسجيل الصوتي رقم ۱٩٨٣٩٦ ۲۰۱۰۰۰ (٦) تبين ان مدتها (١:٤٢ ثانية) وهي محادثه بين رجل وامرأة على المائل امامنا والموجودة على الأسطوانة رقم ٢ المقدمة من هيئة الرقابة الإدارية فأقر بانه هو الرجل الذي يتحدث بالمكالمة وان المرأة هي الدكتورة «س» وأن الحديث كان بشأن الاتفاق على موعد حضورها لحصولها على المبلغ النقدي الشهري المعتاد لها تمت الملحوظة
ملحوظة: حيث قمنا بعرض التسجيل الصوتي رقم ۲۰۱۰۰۰۹۹۱۲۹٦ (۷) تبين ان مدتها (١:٥٤ ثانية) وهي محادثه بين رجل وامرأة على المائل امامنا والموجودة على الأسطوانة رقم ۲ المقدمة من هيئة الرقابة الإدارية فأقر الرجل الذي يتحدث بالمكالمة هو «م. ع» أحمد العاملين بمطعم شجرة الدر وانه هو من قمت بتكليفه بتجهيز المبلغ النقدي وقيمته 6000 جنيه لتسليمها للدكتور «س» وان المرأة هي الدكتورة «س» وان المقصود بعبارة «م. ع» بالمكالمة هو قالي على الحاجه الثانية بس هو يقصد المبلغ المالي 6000 جنيه تمت الملحوظة.
س: ما قولك فيما جاء بتحريات الرقابة الإدارية والثابت بما بتاريخ ٢٠٢٤/٥/٩ الساعة العاشرة صباحاً المحرر بمعرفة ؟؟؟ – عضو هيئة الرقابة الإدارية – “تلوناه عليه تفصيلاً؟
ج: الكلام ده حصل
س: ما قولك فيما جاء بتحريات الرقابة الإدارية والثابت بما بتاريخ ٢٠٢٤/٦/٦ الساعة التاسعة صباحاً المحرر بمعرفة ؟؟؟ – عضو هيئة الرقابة الإدارية – “تلوناه عليه تفصيلاً؟
ج: الكلام ده حصل
س: ما قولك فيما جاء بتحريات الرقابة الإدارية والثابت بما بتاريخ ٢٠٢٤/٧/٣ الساعة الواحدة صباحاً المحرر بمعرفة ؟؟؟القاضي – عضو هيئة الرقابة الإدارية – “تلوناه عليه تفصيلاً؟
ج: ايوا حصل
س: هل كانت ما تنقضاه وتتحصل عليه المدعوة: «س» من مبالغ مالية شهرية وعطايا عينية متمثملة في المأكولات علي سبيل الرشوة؟
ج: أيوة
س: أنت متهم بتقديم عطية عبارة عن مبالغ مالية بصفة دورية للمدعوة / «س.م.ع.ن» حال كونها موظفة عمومية (مدير الإدارة البيطرية فرع القاهرة الجديدة وذلك لمنعها من القيام بواجبات وظيفتها المختصة بها المتمثلة في منعها من الرقابة علي حانوت الطعام خاصتك والمسمي “شجرة الدر” ومن ثم عدم تحرير محاضر بالمخالفات الثابتة بالمطعم خاصتك وذلك علي النحو المبين بالتحققات؟
ج: حصل واعترف بذلك زي ما قوت في التحقيقات.
س: هل لديك أقوال أخري؟
ج لا
كما جاءت أقوال المتهمة «س» كالتالي:
س: ما صلتكي بالمدعو «ع.ع.ي.أ»؟
ج: هو مدير مطعم شجرة الدر
س: هل من ثمة علاقة بينكي وبين سالف الذكر؟
ج: ايوة
س: منذ متى نشأت تلك العلاقة؟
ج: من حوالى سنة وشهر تقريباً
س: ما سبب نشوء تلك العلاقة؟
ج: علشان انا كنت نزلت تفتيش عليه في المطعم اللى هو بيديره واللى اسمه «شجرة الدر» وعملتله محضر
س: ما مضمون هذا المحضر؟
ج: لحوم ودجاج وحمام وبتلو يقدر بحوالي ثلاثة طن تقريبا والمحضر راح النيابة ومعرفش تم فيه لحد دلوقتى
س: ما قولك فيما جاء باقوال المدعو «ع.ع.ي.أ» من قيامك بطلب مبالغ مالية شهرية تقدر في الشهر الواحد بستة الاف جنيه مقابل عدم تحرير ثمة محاضر أخرى خاصة بالمطعم الذي يديره؟
ج: حصل
س: هل قمتى بطلب مبالغ مالية من المدعو «ع.ع.ي.أ» مدير مطعم شجرة الدر
ج : ايوة
س: ما مقدار ما طلبتيه على وجه التحديد
ج: في البداية طلبت منه 4000 وهو بعت 6000 ومشينا على كده علطول
س: هل استجاب سالف الذكر لطلبك بتقديم مبالغ دروية شهرية لكى؟
ج: نعم
س: كيف كنتي تتحصلين على تلك المبالغ؟
ج: انا كنت بروح لحد المحل بتاعه يدينى الستة الاف جنيه
س: كم عدد المرات التي تحصلتي فيها على مبالغ دورية شهرية؟
ج : حوالی ۱۲ شهر تقريبا كل شهر ستة الاف جنيه
س: ما سبب قيامك بطلب مبالغ مالية من المدعو «ع.ع.ي.أ» مدير مطعم شجرة الدر ؟
ج: علشان معملوش محاضر زى اللى عملتها قبل كده
س: هل التزمتى بالاتفاق بينك وبين سالف الذكر بعدم تحرير ثمة محاضر بالمطعم خاصته؟
ج: ايوة علشان كده لم يتم تحرير اى محضر غير اللى انا عملتهولوا اول مرة
س: ما هي آخر مرة تقاضيتي المبلغ الدوري الشهرى سالف الذكر؟
ج: اول شهر أغسطس اللى احنا فيه.
س: هل توجد مخالفات بمطعم شجرة الدر ابصرتيها ولم تحررى عنها ثمة مخالفات خلال تلك المدة؟
ج: ايوة
س: ما طبيعة تلك المخالفات؟
ج: انا مرة روحت لاقيت عنده لحوم بتلوا صغيرة وده ممنوع علشان الحفاظ على الثروة الحيوانية
س: ما هو الوصف القانوني لتلك المخالفة؟
ج: ذبح عجول صغيرة خارج المدبح لان العجول الصغيرة لا يتم ذبحها حال كونها صغيرة السن وبالتالي تلجأ الناس لذبحها خارج المذبح
س: هل ثمة مخالفات أخرى ابصرتيها غير تلك المخالفة؟
ج: ايوة
س: ما مضمون تلك المخالفات الأخرى؟
ج: وجود مقطعات كندوز صغيرة مجمدة بلا اختام وده يدل على انها مجهولة المصدر
س: ما هو الوصف القانوني لتلك المخالفة؟
ج: حيازة سلع مجهولة المصدر وغير مصحوبة بالفواتير الدالة عليها
س: ما سبب عدم تحرير محاضر بتلك المخالفات؟
ج: علشان الفلوس اللى انا باخدها منه كل شهر
س: هل اثبات تلك المخالفات يدخل في نطاق مهامك الوظيفية
ج: ايوة
مخالفات جسيمة في مطعم شجرة الدر.
