كم ألف ليل
بقلم الشاعر / أحمد إبراهيم النجار
إتمكيجي قومي البسي
توب الرماد
لون طرحتك غامق
وغارق ف السواد
وأقفلي الباب بباب
من بعده باب
ده القلب شارب م الدموع
من جرحه شاب
وانتِ قاعدة بترقصي أُرقصي
نوع الذواق
من نوع رديئ إتمكيجي
فات الميعاد
والحلم فات
أصبح بواقي من حطام
أصبح فتات
وشهور صيام فيها الأذان
مالهوش وجود
والحلم مات
أُرقص وفوت
على كل أشلاء الفرح
ع الحَمّل
وسط المراسم إندبح
ودمه جاري بين صفوف
ما بين ملايين الألوف
لسه الفرح واخد معاه
كل أحلام الشروق
سكن الغروب
على كل حته ف مطرحك
مظهرك أصبح قبيح
إتمكيجي أكتر كتير
وأطلعي وسط الطريق
وسط الجموع بين الصفوف
على حلم ضاع
منقوش على شهادة شهيد
وبإيه تفيد رقصتك؟
وسط الأهات
ده الحلم فات
والفجر وهم بيتحكي
بس ف بارات
بين السكارى المدمنين
ودمعة حيارى بين دروبك
حاكيه ف سنين
للفجر دايما مشتاقين
للبسمة حتى لو خداع
أو ضحكة ع الخد الحزين
ملعون يا ليل
ساكن سنين
والفجر منسي من زمان
فى قاموس كتاب
فى قاموس كتاب العاشقين
مالهوش وجود
من كام سنة وسط الطريق وبترقصي
متمكيجة
متحزمة ؟
والطير بيسقط م الشجر
صارخ جريح
والحلم أصبح شئ محال
و بعيد منال العطشانين
لفجر يرجع من جديد
ويهل عيد
من ألف ألف ألف ليل
أعمى العينين
مالهوش مثيل
