زجل قصيد باللهجه العاميه اللبنانيه
بقلم الأديب والشاعر يوشع علي إسماعيل
قنديل العمر
شو بعد من العمر مبقي
شو بدي لقي مصايب تلقي
خريف العمر وراقوا مصفره
يا شجرة الأيام بلشتي تطقي
كل يوم بتهر عن زنودي ورقه
تيتعرى ثوبي وأغرق بحسره وحرقه
مع الورقه أشرق دمعتي شرقه
غص فيها والهم فيها سَقي
كنا نتباهى بالخدود لمقمره
متل رغيف الشمس محمره
وكان يغني إلي قمر مشغره
من حواضي أجمل زهر ينقي
وزنود متل الصخر مفتلي
وأعتلي صهوة جواد المرجلي
وعناتر السحات أحصدها بمنجلي
ودعستي تقول للأرض انشقي
اليوم ستين من العمر صارو
وزادو وبلش الزهر يهرهر زرارو
احفظو للشاعر هيبة وقارو
يا ولادي برجايِّ احفظوا حقي
تذكروا لما كنت الجبل شيلوا
وكحل عيون الصخر بأزميلوا
قنديل العمر احترق فتيلو
خلص كازو صرت عالعكاز لَقي
بقلم الأديب والشاعر يوشع علي إسماعيل
زجل قصيد باللهجه العاميه اللبنانيه
