فَصبرٌ جَميل
بقلم:سمر يوسف
على الطريقة اللى بنشيل بيها نفسنا كل مرة من غير ماحد ياخد باله ..
من غير مانقول احنا محتاجين إيه .
صبر جميل عالغصة اللى بنبلعها ونكمل بيها يومنا عادى ..
صبر جميل على لحظات التوهه والوحدة اللى بنقف فيها مع نفسنا من غير قناع ولا صوت ..
صبر جميل على الطرق اللى مشيناها واحنا مغصوبين ومش شايفين قدامنا ..
بس متطمنين ان فى حد ماسك إيدينا ومش هيسيبها ..
صبر جميل على الأمان اللى كنا فاكرينه دايم ..
وطلع مؤقت وإن اللى جاى مخيف ومش مضمون
صبر جميل عالناس اللى جت ومشيت من غير تفسير ..
صبر جميل على اللى مفهمناهوش فى وقته وفهمناه بعد فوات الاوان .
صبر عالدعوات اللى ربنا مااستجابش ليها بس لسه رافعين ايدينا ليه وجوانا إيمان إن ربك هيجبرنا ومش هيرجعنا بإيدينا فاضيه ..
صبر على كل حلم مكملش ..
صبر جميل على كل درس اتعلمناه .
وكل حد فقدناه وخد منا حته وهو ماشى .
صبر عالحياه اللى بتاخد وتدى وإحنا معاها بنتهد ونقوم ونكمل حتى لو مش قادرين .
هى دى الحياة
والحمد لله اننا بنعرف نبتدى من جديد..
ونلم نفسنا بضحكة وكلمة طيبه وصديق وفى وحقيقى مخبينا جوه قلبه ..
هى دى الحياة ..
والايام اللى عدت صفحات .. بس ماينفعش نقلبها ..
لأ.. ده احنا لازم نقراها كل شويه .. عشان نحفظ الدروس كويس
عشان احنا اللى عيشنا الايام دى .. وسابت اثر عايش جوانا ..
حياه ..فصبر جميل على روحنا ..
عيش راضى
.ووقَّع على هدنه مع القدر عشان توصل بسلام
ان الله مع الصابرين
#يوميات_باشمدرسة
#وزيرةالسعادةツ
24_5_2025
