“أوامر تشغيل”
بقلم:سمر يوسف
كام مرة وسط اليوم بعد ماتصحى وتنزل وتشتغل وترجع وتنام حسيت إنك زى الآلة متبرمج
كإن في زرار “تشغيل” بيتداس عليه الصبح،
وزرار “إغلاق” فى آخر اليوم.
مفيش مساحة نفكّر… مفيش وقت نِحس…
كأننا آلات لابسة هدوم بني آدمين، بننفّذ أوامر، ومهام، وننسى إن لينا قلب وروح بتتعب، ونَفَس بيضيق.
إحنا مش آلات..إحنا بني آدمين… وكل واحد محتاج بس دليل إنه لسه حي.
بقينا بنعيش زى الروبوت كل حاجه (اسطمبة) الابتسامه ، الكلام ، حتى الرد متبرمج
“عامل إيه؟”
“الحمد لله”
بتحس إنك بقيت جهاز إلكتروني بتتشحن بقهوتين ف اليوم،
وبتعمل Restart لما دموعك تقف في زورك
وبتهنّج لما حد يقول “خد وقتك” وأنت أصلًا نسيت يعني إيه “وقت لنفسك”.
وانت معدِّى وسط كل دة بتشوف نظرة عينك في المراية فيها الروح ..
تشم ريحة هوا حلوة دخلت من الشباك،
أو تسمع كلمة من حد بيحبك وبيقولك “وحشتني” من قلبه.
وساعتها بس، بتعمل Reset
في اللحظة دي بتحس إنك مش آلة…
إنسان، روح ولحم ودم وشعور.
بتفتكر انك مش مُصنَّع للإنتاج…
وإنك مخلوق للحياه
وأكتر حاجة وصلتنا لكدة
إننا اتعودنا على وضع افتكرناه وضع مؤقت… ومع الوقت إتحول لوضع دائم.
كل ما صوت جواك يقولك
“شوف نفسك”،
ترد تقول له “مش وقته”.
لحد ما ييجي يوم…
ننسى إحنا كنا مين، وكنا بنحب إيه، وكنا بنحلم بإيه.
نعيش نرد على رسايل الشغل، وننسى نرد على رسائل روحنا.
نلبّي كل طلب حوالينا،
ونسيب نفسنا على وضع
الـ Silent.
واحنا ارواحنا هشه رقيقة ومش طيّعة زينا.
الروح لو جاعت…
هتسكت وتتطفى وتسيبك تعيش بس من غيرك.
“اللي بيعيش حياته كلها بيحاول يرضي الدنيا… بينسى يرضي نفسه.”
فلو انت كده،
دوّر على أي لحظة تفكّرك إنك إنسان
خلّي لنفسك وقت تسأل فيه نفسك:
“فرحتِ إمتى آخر مرة؟
اشتقت لمين وغمضت عينك وسكت؟
كتبت لنفسك جواب؟
ولا نسيتِ عنوانك؟”
ارمى نفسك فى حضن اى حاجه فيها روح ترد فيك الروح
اعمل صيانة دورية ليها
لأنك لو معملتش كده، هتتحول فعلاً لمجرد آلة
رجّع صوتك واعمل Restart لقلبك.
قول لنفسك: “أنا مش آلة… أنا حياة كاملة…
افتكر إنك مش مصنوع عشان تشتغل لحد ما تموت…
إنت مخلوق تعيش، وتحس، وتفرح، وتعيّط، وتحب…
واعرف ان كل زرار “تشغيل”… لازم يقابله زرار “رحمة” دوس عليه
وارجع ورا واقعد فى اى مكان على جمب .
خُد نفسك
إطفى كل حاجه .
وقف جرْى
قول لنفسك براحتك خالص ومش لازم دلوقتى
قرار بسيط ..هترحم بيه نفسك قبل ما الماتور يتحرق ..
#يوميات_باشمدرسة
#وزيرة_السعادةツ
S𝓪𝓶𝓪𝓻 𝓨𝓸𝓾𝓼𝓼𝓮𝓯 ツ13_7_2025
