فعل وفاعل ومفعول به
بقلم :سمر يوسف
إحنا أدوارنا بتتبدل طول الوقت من غير ما نحس…
اوقات نكون الفعل بكل اشكاله
واوقات نبقى الفاعل… اللي في إيده القرار والاختيار
واوقات نلبس توب “المفعول به” ونتجر ورا أحداث مكتوبة مش بإيدينا.
إنت مين؟
إنت الخطوة ؟
ولا انت اللى اخترت الطريق؟
ولا الطريق هو اللي اختارك؟
أيام هتبقى فعل
مكان هيتغير بحضورك
كلمة منك هتفتح باب لحد ولا هتقفله من الدنيا واللى فيها ؟
جدعنة تسند بيها حد قبل ما يميل
ولا دوا يشفي قلب وتهون عليه
وأيام هتكون فاعل
إنت اللي بتختار وتاخد القرار
تتمسك او تسيب
تتقدم او تلف وترجع
تقول او تسكت
تختار تكون النور، أو الأثر، أو السبب
وأيام هنكون مفعول به
ضحية توقيت غلط
مجرد “نتيجة” لاختيار حد تاني
إتنسيت، إتركنت، إتسابت
وإتقال عنك كلام ما يشبهكش
وإتفرض عليك وجع ما اختارتوش
ضعيف… تستقبل الفعل وإنت ساكت
لا بتهش ولا بتنش ولا بتاخد موقف
إنت اللي بتختار تبقى إيه…
فلو كنت فعل
خليك فعل طيب عشان في مفعول به هيدفع تمن فعلتك دي
خليك اللحظة الحلوة
الكلمة اللي ترجع الضحكة
اللي بيبني ويصلح ويبهج حواليه
ولما تبقى فاعل فى جملتك خليك فاعل خير ، واعي، رحيم
واختار فعل طيب يسيب أثر حلو مش خدش في قلب حد
فكّر: فعلك هيقع على مين؟
مين اللي هيشيل التبعات؟
مين اللي هيتوجع؟
مين اللي هيتكسر؟
مين اللي هيسكت عشان مش لاقي رد؟
متبقاش فاعل مُفترِي
فاعل مستتر… تعمل عملتك من غير ما حد يشوفك ويشيل شيلتك
وتسيب مفعول به صامت، صابر، لا حول له ولا قوة
وحتى لو كنت مرة مفعول به،
ماتنساش إنك لسه تقدر تبدأ جملة جديدة
ولو لزم الأمر، خليك مفعول به صابر
لحد ما ربنا يبعتلك “مفعول لأجله” ياخد بإيدك ويغيّر معنى الجملة عشَانك
وبكرة تتعافى، وتبقى فاعل
وتنقذ غيرك من إنه يفضل مفعول به للأبد
مش مهم إنت موقعك فين
المهم تبقى مبنى للمعلوم حد واضح ،مفهوم قلبه ابيض وافعاله خير ، واللى يحتاجك دايما يلاقيك حافظ مكانك من الاعراب
فعل وفاعل ومفعول به
#يوميات_باشمدرسة
#وزيرة_السعادةツ
S𝓪𝓶𝓪𝓻 𝓨𝓸𝓾𝓼𝓼𝓮𝓯 18_7_2025
