والله ياجماعة أنا هتكلم في موضوع غاية في الخطورة لأن الموضوع زاد عن حده وأصبحنا نعيش هوة حقيقية وانفصام وحالات من الشيزوفرينيا حقيقة لامراء فيها
أولا ليس بالبوستات والمنشورات والإيموشانات (معرفش كده الجمع صح ولا لا )
تُرفع الدرجات ولا تتنزل الرحمات
وليس بإرسالك الدعاء لكل يوم
دعاء يوم السبت ودعاء يوم الحد ومحدش يكلم حد ودعاء يوم الاتنين اللي جاي أصل الاتنين ده أنا معزوم ع الفطار مع جماعة كنا بنلعب كورة زمان وفجأة ضرب المدفع والنتيجة صفر صفر وهوب راحوا جايبين جون وقامت خناقة بين الفريقين وجمعونا كلنا في مستوصف خيري واتصالحنا والنهاردة الذكرى الخمسين للمباراة
في شرع مين الأدعية دي ومين خصصها بأدعية معينة يعني ينفع يوم الاربع يستلف دعاء يوم الاتنين ويردها له في المسرات
وورد عن مين
والرسائل الهبلة بتاع لاتتركها تتوقف عندك
(وأنا مالي ما ان شالله لاوقفت ولا قعدت ولا حتى اشتروا لها كرسي متحرك من جمعية رسالة)
وبرضه اسمها رسالة
مش يمكن تكون رسالة لك أنت وأنت المقصود
(اشمعنى أنا ياعم )
ونيجي بقى للكبيرة أوووي
أنا :جالي تهنئة بليلة النصف
هو : النصف من شعبان ؟
أنا :لا حضرتك ليلة النصف من رمضان !!!
هو :إيه أنت بتقول ايه
ليلة نص رمضان
ودي مالها لامؤاخذة ؟
باعتين لي تهنئة أنت بتتكلم جد ؟
أيوه والله ده حصل
طيب مبعتوش تهنئة في طلعة رجب
؟
لا يمكن نسيوا ؟
مش عارف لازم أسأل ازاي يبعتوا ف نص رمضان
وميبعتوش ف طلعة رجب
يمكن يخلوها مناسبة واحدة لما ييجي رجب السنة الجاية مع رمضان؟
