نسـينا إحـنا رجـال
خواطر أغاني الأسواني
الشــريف_أحمد؏الدايم
بيقول النجم كتير عدتيوا
ساعة سيره عالمريخ
وبيقول البدر هناك ناديتو
خد إسمك وكتب التاريخ
ويقول وينَمّي الكدب وَكَبَّرَ
وعمل له معامل تفريخ
ما انت في اسمك كدبه بتكبر
واحنا بنعشق كِدبْ الشيخ
…….
إحـنا زمانَّا زمن الغش
وَفِيهِ الْغِشُّ حلو وَطَاب
وشيخنا يبلغ مليون وش
واسود نِيَّة واحلى خطاب
يَعْرِفُ يَنْصِبُ ويَعْرِفُ يألف
ويعمل قطب من الأقطاب
قال بيداوي إللي ما بتولد
ده كمان وبيجيب الخُطَّابْ
…….
قال بيربط وقال بيحل
وقال بيزيد العُقْدَة رباط
وقال بيهدي وكمان بيضل
وقال زعله يسبب إحباط
زبونته بتحلف للناس
إنه ملوش في الإسْتِعْبَاط
غير مرة يقرأ على الراس
ومرة يقرأ تحت الباط
…….
وساعات يطمطم في الجن
وساعة يِقَلِّب في الأوراك
وساعة بريشه عريضه تفل
يفضل يرسم فوق السـاق
وإللي بترفص يقول ملعونة
أصلها بتجني الجن الـعُشَّاق
ولا أَبَدًا ما يرضي بأي زبونه
لما تجيلُه له بدون زواق
…….
أَمَّا آلَّلي توافق وتستلم
وترضيه بقضي الاغراض
لازم لأجل الدوا تتعلم
إزاي تَهُوّنْ في الاعراض
سِرّ الجرح بيفضل ساكن
فيها وبتداري الأعراض
يا أطباء مريضة ولكن
نأتمنهُم على الأمراض
…….
حتى الأعمال السفلية
عليت وغليت في الأسعار
أصل دي خبرة ومسئولية
وليها ضمان وختم شعار
واحنا يا رجالة اتعودنا
نحكي مآسينا في أشعار
وكأن الخالق أوجدنا
لاجل نزيد وصف العار
…….
علشان نشقى ونتعب ونعطي
للسـت وتعطي الدجال
تحرم بيتها وليه بتهدي
كل ما يطلب باستعجال
والرزق على الله مكتوب
وكاتب حَظُّنَا والآجال
إحنا في تُوهَا نسينا نتوب
حتى نسينا إحنا رجال
