* * أ أنت صائم ؟ * *
كلمات / حاتم الغيطاني. مصر.
إنت صايم؟
إنت فاهم يعني إيه إنت صايم؟
إنت فرحان بالصيام؟
إنت فرحان بالفطار والقيام؟
كل ده حلو وجميل
كل ده مالوش بديل
في الحقيقة وبالدليل
الصيام معناه حقوق
والقرآن معناه حقوق
يلا اصح معايا فوق
إنت أديت فرض ربك؟
هو ده أهم حق
حق ربك اللي خلقك واللي رزقك
لما تسمع.. الله أكبر
أي حاجة تانية.. أصغر
قم وكبر.. قم وشمر
إنت عامل إيه في الحقوق؟
حق أمك ثم أبوك
إنت أمك عنك راضية؟
ولا هي حاجة فاضية؟
لما تفضى تروح تزورها
ده أنت جاحد كل خيرها
إنت عارف فضل أبوك؟
لما كان من الصبح يخرج
يسعى لك إنت وأخوك
إوعى تنساه في الزحام
وتقول مشغول بالصيام
إنت عامل إيه في الميراث؟
إنت واكل حق وارث
كلت حقه بأي سكة
بأي حبكة وأي فكرة؟
رجع للوارث فلوسه
وحِبْ فوق رأسه وبوسه
واترك شيطانك ودوسه
إنت عامل إيه في العمل؟
إوعى تظلم حد حقه بين إديك
كنت عامل أو معلم أو طبيب
أو مهندس أو محامي أو خبير
إوعى تظلم حد.. عيب
صن صيامك يا لبيب
اقرأ القرآن في شهره
وكل شهر وكل دهره
افهم معانيه وذاكره
مش كلام تقراه وتفخر
إن كم مرة ختمته
طب عملت بكل كلمة؟
ولا ده كلام للدعاية؟
القرآن معناه تنفذ
كل حرف وكل آية
في اللسان والمعاملة
وفي الفراق والمقابلة
وفي الطريق والمواصلة
في المصالحة وفي الخصام
هو ده معنى الصيام
هو ده قرآنا وصلاتنا
هو ده عين الفهام
والحقيقة بدون مجاملة
هو ده وزن المعادلة
إنت دينك مش كلام
انت دينك المعاملة .
كلمات / حاتم الغيطاني. مصر.
