الْإِعاقَه طاقَه
نظم /الزجال عبد الله الخفيري
مَنْ عَرْصَة لَمحَبَّه ..
مَ لَزْهار نَهْدي ليك باقَه
عَرْبون العَشرَه والصَّداقَه
بْعَكَّازَك لَبْيَض ..
تمْشي ف الطَّريق
بْعَز وُأَنَاقَه
الْإِعاقَه طاقَه ..!
بَ صْبَرْ وُسَنَد وُإِيمانْ
هَدَفْ مَرْسومْ لْكُلْ إِنْسانْ
حَكْمَه مَ الله لَعظيمْ
خَلْقَك من ذوي الهِمَم خْصيمْ
تْحَقّق هْدافَك
تَبْلَغ مُرادَك ..
عْيُونّا تْنَوّر ليكْ الطّريقْ
ؤُذانّا تَصْغَى وُتَسْمَع ليكْ
بْ لَحْمَك وُدَمَّك
طاقَه وْرُوحْ
كُلّكْ طُموحْ
تْعيشْ مْعَزّز مْكَرّم
سالَم مْسَلَّمْ
مَاتْبالِي مَاتْخَمَّم
شْحالْ مَن ضْريرْ
مَحْرومْ مَن ضَيْ عْيُونُه
وُمَنْ سَمْعُه يِعانِي
فَاقَدْ لَكْلامْ
رْموزُه مْعَاني
بْقَلبُه يْشوفْ ويَسْمَع
يَفهَم عَلْ تْمَامْ
خْصيمْ يِحاوَرْ الزّْمانْ
مَا تْقُولْش مُعاقْ يا إنْسان
لِيكْ مَمْدُودَه يَدْنَا
رَاسَم عْلَى وَجْهَك بَسْمَه
فْ إِبْدَاعَك عِلْم وُحَكْمَه
فارَضْ وْجُودَكْ
بْعَقْلَك ؤُجَهْدَك
واضٓعْ بَصْمَه
بِهَا تَرْسَم طْريقَك
ب عْزِيمَه قْوِيّه
وإِرَادَه وُطاقَه
ذوِي الْهِمَمْ
يَتْحَدّاوْ الْإِعَاقَه ..!!
————————
هدية للاستاذة نزهة زنبوع ومن خلالها لجميع ذوي الهمم)
