دكتور عبدالله أحمد ( مابقاش ليا حد غير ربنا ؟)
متابعة نشوى شطا
الكلمة دي بيقولها الناس اللي قلوبها اتكسرت ، او اتحطوا في ضيقة ، وتحس انها كلمة بتتقال وقت الضعف ؟ .. مع ان لما سيدنا موسي مكانش له حد الا ربنا .. ساعتها البحر انشق ، والصحراء انفجر منها عيون المية اللي لحد النهاردة موجوة..
السيدة هاجر لما مكانش ليها حد هي وابنها غير ربنا.. ربنا في قلب الصحراء خرجلها بير زمزم..
سيدنا يونس لما مكانش له غير ربنا .. الحوت ماقدرش يهضمه ، وطلعه بره من غير ينقص منه ضافر او شعرة..
السيدة مريم لما مكانش ليها حد الا ربنا .. ساعتها ربنا جعل رضيعها يتكلم ويخرس لسان الناس عنها ؟
اللي مالوش غير ربنا.. في موقف قوة مش ضعف ، في الفريق الكسبان مش الخسران ، في الزاوية المسيطرة مش المهزومة المكسورة ، انت جامد جدا ، ومش كلام ، انت معاك اللي بيقول للشيء كن فيكون ؟
افتكر ديما الكلمة دي ” ماذا وجد من فقد الله ، وماذا فقد من وجد الله “
اللي مابقاش مع ربنا هيلاقي ايه من بعده يساوي ويعتبر مكسب ؟ ، واللي مابقاش له غير ربنا هو أغني الناس وكسبان مكسب الدنيا والآخرة..
اللي فيها لله مابتغرقش ، واللي مالوش غير ربنا ، له كتير قوي وهو مش دريان ، معجزات هتحصله ، وبركات هتحل عليه، وستر ولطف هيصاحبوه ، وقوة وهمة هتضاف لقلبه من حيث لا يدري ولا يحتسب..
ف اجمد كده وماتضعفش ، اتحامي في ربنا ، وقول الله المستعان ، ومفيش حد بيقولها ويطلب المعونة والسند من الله بصدق ، غير لما بيعينه ، ويقويه علي كل شيء ، ويلين في ايده الصعب..
ربنا بيقول عن سيدنا داوود “وألنا له الحديد” اللي قدر يخلي الحديد في ايد عبد من عباده لين كما الصلصال يشكله زي ماهو عايز ؟ .. تفتكر بقي صعب يلين حالك وييسره ، ويسلك أمورك ويملي عليك حياتك ودنيتك؟ ، حاشاه سبحانه وتعالي..
” والله هتفرج ، وهتشوف ”
دكتور عبدالله أحمد ( مابقاش ليا حد غير ربنا ؟)
