لما تبقى الغربة جوه القلب مش في المكان
بقلم/نشأت البسيوني
في وقت من الأوقات بنكتشف إن أصعب غربة مش إنك تبعد عن بلدك ولا إنك تمشي في شارع ما تعرفش فيه حد أصعب غربة إنك تبقى وسط الناس وقلبك حاسس إنه لوحده وإن الشخص اللي كنت بتعتبر وجوده أمان بقى هو نفسه سبب الحيرة وإن الكلام اللي كان بيطمنك زمان بقى غيابه هو اللي بيقول لك الحقيقة يمكن عشان كده الإنسان ساعات بيتغير من غير ما ياخد باله مش لأنه فقد قلبه
ولا لأنه بقى قاسي لكن لأنه اتعب من كتر ما كان بيحاول يفهم حاجات ما لهاش تفسير واتعب من الانتظار ومن الأسئلة اللي ما لقتش إجابات ومن إحساسه إنه دايما لازم يبذل أكتر عشان يحافظ على حاجة كان فاكر إنها محفوظة لوحدها وفي لحظة معينة يبدأ القلب يهدى مش لأنه نسي لكن لأنه فهم إن بعض الحكايات مهما حبيناها مش مكتوب لها تكمل وإن بعض الناس مهما كانت غالية
مش دايما يكون وجودهم في حياتنا هو النهاية السعيدة ويمكن يكون الوجع الحقيقي إنك تفضل تتمنى الخير لشخص تسبب لك في وجع كبير وتدعي له براحة البال وأنت نفسك محتاج حد يدعي لك لأنك عارف إن الكراهية مش هترجع لك الأيام اللي ضاعت وإن العتاب مش هيغير اللي حصل وإن أقسى حاجة ممكن تعملها في نفسك إنك تفضل عايش أسير لحكاية انتهت وأنت لسه بتحاكم كل
يوم على تفاصيلها عشان كده في يوم من الأيام هتصحى وتكتشف إن الرسالة اللي كنت مستنيها ما بقتش أهم حاجة وإن الاتصال اللي كان قادر يغير مزاجك ما بقاش هو اللي بيحدد يومك وإن الغياب اللي كان بيخوفك بقى مساحة تتنفس فيها وإنك أخيرا بقيت تعرف تعيش من غير ما تسأل مين موجود ومين مش موجود وساعتها هتفهم إن التعافي مش معناه إنك بطلت تحب وإن النسيان مش
شرط يكون محو للذكريات أحيانا التعافي إنك تفتكر من غير ما تنكسر وتشتاق من غير ما تجري وتحب من غير ما تطلب وتسامح من غير ما ترجع لنفس المكان اللي وجعك ويمكن أجمل انتصار للإنسان إنه يخرج من الحكاية بنفس القلب الطيب اللي دخل بيه رغم كل اللي شافه ويقول أنا ما ندمتش إني حبيت لكني ندمت إني نسيت نفسي وأنا بحب وأنا النهارده مش بدور على حد يكملني أنا
بدور على نفسي اللي ضاعت مني وأنا بحاول أرضي الجميع وأحافظ على كل شيء وأمنع النهاية بأي ثمن لقد فهمت أخيرا إن بعض النهايات مش خسارة وإن بعض الأبواب لما بتتقفل بتفتح للروح طريقا كانت مش شايفاه وإن القلب مهما اتوجع يقدر يقوم من جديد بس المرة دي هيقوم وهو عارف قيمته وعارف إن راحة البال مش رفاهية وإن الكرامة مش قسوة وإن البعد أحيانا بيكون رحمة وإن الإنسان مش لازم يفضل في مكان يؤلمه لمجرد إنه كان في يوم من الأيام أسعد مكان عرفه
لما تبقى الغربة جوه القلب مش في المكان
