_بقلم: محمود أحمد أبو العلا_
من أغرب ما قرأت إن في بلاد لسه بيتباع فيها الإنسان بالكيلو.
مش بالمعنى الحرفي، بس بالمعنى اللي يوجع أكتر.
تخطف، تتهرب، تشتغل 16 ساعة، وتقبض ملاليم، ولو اتكلمت يقولولك “احمد ربنا إنك لاقي شغل”.
ومن أغرب ما قرأت إن في طفل عمره 10 سنين بقى خبير في نوعين من الصواريخ.
مش عشان بيحب الفيزياء. عشان الصواريخ دي هي اللي بتحدد هينام في بيته ولا تحت الركام.
حافظ أصوات القصف أكتر من حافظ جدول الضرب. وبيفرق بين صوت المسيرة وصوت الطيارة وهو مغمض.
ومن أغرب ما قرأت إن في ناس بتتخانق على الكومنتات على خبر مجاعة.
واحد بيقول “يستاهلوا” والتاني بيرد “هما السبب”.
كأن الجوع بقى وجهة نظر. وكأن الموت بقى ماتش كورة بنشجع فيه.
ومن أغرب ما قرأت إن في مستشفيات في 2026 لسه بتشتغل بكشاف الموبايل.
دكتور بيعمل عملية قلب والدادة ماسكة الفلاش.
وفي الناحية التانية إعلان عن روبوت بيطبخ ويغسل.
نص العالم بيطير للمريخ والنص التاني بيدور على نقطة مية نضيفة.
ومن أغرب ما قرأت إن “السلام” بقى كلمة عيب.
لما تقول عايزين نوقف ضرب يتقالك “ساذج” و “مش فاهم السياسة”.
بقت الشجاعة هي إنك تبرر القتل، والجبن هو إنك تقول كفاية.
ومن أغرب ما قرأت إننا بقينا بنحفظ أرقام الشهداء أسرع ما بنحفظ أرقام صحابنا.
100، 500، 2000. بنقولهم ونقلب الصفحة.
نسيوا يقولنا إن ورا كل رقم اسم، وبيت، وحلم متعلق على الحيطة.
الغريب مش اللي بيحصل.
الغريب إننا اتعودنا عليه.
الغريب إن القلب اللي كان بيتقبض زمان، بقى بيعمل “سكرول” وينزل.
يمكن عشان كده بقيت أقرأ كتير.
بدور على خبر واحد غريب… بس حلو.
خبر بيقول إن الحرب وقفت.
إن العيال رجعت المدرسة.
إن الأم لقت ابنها.
بس للأسف، من أغرب ما قرأت… إني لسه مستني الخبر ده.
*من أغرب ما قرأت*
