ياترى ايه حكايه الدكتور محمد المغربي
عادل محمود
الدكتور محمد المغربي، دكتور الأمراض النفسية وأمراض المخ والأعصاب، بقاله أكتر من 10 سنين على السوشيال ميديا، وصفحته على فيسبوك فيها أكتر من 2 مليون متابع.
معاه ماجستير في الأمراض النفسية والعصبية، وحامل لكتاب الله وحافظ الفقه والسنة.
كمّل دراسته في أكاديمية القوات المسلحة وبقى ملازم، وفتح أكتر من مشروع جنب الطب، ووالدته أخصائية تخاطب من كلية علوم.
المشكلة بدأت لما محمد بدأ ينزل صوره على السوشيال ميديا وبدأ يعلن عن شغله كدكتور كنوع من أنواع التسويق ليه ولشغله. محمد بدأ يجيله بعد الصور دي كومنتات كتير معاكسة من البنات، والبنات بدأت تعلّق على وسامته وشكله، ويقولوا هو قد إيه حلو وعايزين خطيبهم يبقى زيه وحتى أزواجهم!
وده كان شيء مش مفهوم… إزاي الصور أثارت الجدل بالشكل ده؟
نوعية الكومنتات دي استفزت ناس كتير جداً، خصوصاً إنها كانت كومنتات جريئة من نوع:
“يا ريت خطيبي زيك” –
“أنا أول ما أشوفك لو تعبانه هخف يا دكتور” –
“أنا تعبت لما شوفتك!”
ولاد الحلال دخلوا على أكونتات البنات دي وبعتوا لخطيبهم أو الأشخاص المتجوزينهم النوعية دي من الكومنتات، وبعد ساعات كانوا منزلين على صفحتهم إنه تم الانفصال، وربنا يعوضهم!
ورغم إن الدكتور ضحية وملوش دخل بردود أفعال البنات، إلا إنه كان محور هجوم كبير من المتابعين، وده بسبب إنه اتقال إنه بيستعرض وسامته علشان صفحته يجي لها متابعين أكتر، وإن النوع ده من الكومنتات مش بيزعّله… بالعكس ده بيشهره أكتر.
لدرجة إن انتشرت على السوشيال ميديا حملات بيطلبوا فيها إنه يتوقف عن العمل علشان هو متعمد يفتن البنات ويخرب بيتهم!
ومن ناحية تانية، في ناس كتير دعمته وقالت إنه دكتور شاطر وإنه مش مسئول عن تصرفات غيره ولا عن أخلاقهم، خصوصاً إنه يعرف ربنا ومن عيلة محترمة!
ناس كتير تدخلت في الموضوع وقالت رأيها، زي الشيخ عبدالله رشدي اللي نصح البنات إنها تبقى عارفة قيمتها وما تتفتنش من اللي بتشوفه على السوشيال ميديا، وإن لازم نغض بصرنا!
ولحد دلوقتي الموضوع عامل جدل كبير على السوشيال ميديا، خصوصاً بعد ما واحدة من البنات اللي اتفسخت خطوبتهم طلعت وقالت إنها كانت بتهزر، وممكن تكون غلطت، لكن ده كان كومنت عفوي لا يستحق إنهم يسيبوا بعض، لولا تدخل الناس اللي وقّعت بينهم وقالت: “حسبي الله ونعم الوكيل”.
دلوقتي ناس كتير بتدافع عن الدكتور وبتقول إنه دكتور شاطر وإن دي مش مشكلته، ومش مسئول عن سلوكيات غيره!
ياترى ايه حكايه الدكتور محمد المغربي
📧 اشترك في النشرة البريدية
أهم الأخبار توصلك على بريدك.
💬 التعليقات (0)