زجل قصيد باللهجة العامية اللبنانية
صوت شاعر
يا شعر دخلك سماع صوتي
شاعرك أنا تذكرني بعد موتي
بقلبي عملت عرش بيتك
ومن حروفك عملت قوتي
ياما من دموع السهر سقيتك
تصرت للتاريخ صوره منحوتي
حُب وفرح وحزن غَنيتك
سامحني إذا معي ماتت بيوتي
سنين عمري من قلبي هديتك
عشقتك أكتر من عشق عشتروتي
من جوارح قلبي دمي عطيتك
تتخلد عالأرض بروح ملَكوتي
للشعار معبد صلا بنيتك
بقلب هيكل بأسم لاهوتي
بمحرابك يرشح عطر زيتك
من زكا طيوبك طابت زيوتي
غربلت حبك رجعت نقيتك
زرعت طفل لقيتك توتي
موسمك أقبل بعقل حبيتك
من الملفي وعيت عاتخوتي
طويت حساب عمري وما طويتك
يا ريت تلفني بقماش عمرك
وتحفر أسمك عاخشب تابوتي
يا شعر دخلك سماع صوتي
بقلم الأديب والشاعر يوشع علي إسماعيل
