في لحظة من اللحظات اللي بتفضل محفورة في ذاكرة الوطن

بقلم: مينا خزام
بتاريخ: الأحد 8 نوفمبر 2026

في لحظة من اللحظات اللي بتفضل محفورة في ذاكرة الوطن

، وقف الرئيس عبد الفتاح السيسي جنب الدكتور مجدي يعقوب، ومسك إيده بكل محبة وتقدير، وقال جملة هتفضل تتردد في قلوب المصريين كلهم: “مصر لن يكفيها إلا أن يكون لديها 10 آلاف مجدي يعقوب”.

جملة مش مجرد كلام بيتقال في مناسبة، دي شهادة حب وتقدير من رئيس دولة، لراجل أفنى عمره كله في خدمة الإنسانية، من غير ما يفرق بين غني وفقير، ولا مسلم ومسيحي، ولا مصري وأجنبي. جملة بتختصر حكاية راجل اسمه مجدي يعقوب، اللي بقى رمز للرحمة والعلم والإنسانية في العالم كله.

الدكتور مجدي يعقوب مش مجرد جراح قلب عالمي، ده أسطورة حية. راجل بدأ حلمه من قرية صغيرة في مصر، وطلع للعالم كله عشان يثبت إن المصري يقدر، وإن العلم لما يتجمع مع الرحمة بيصنع معجزات. على مدار أكتر من 60 سنة، أنقذ آلاف القلوب، مش بس بالجراحة، لكن بقلبه الكبير اللي كان دايماً مفتوح لكل مريض.

لما الرئيس السيسي بيحتضن الدكتور مجدي يعقوب بالشكل ده، هو بيقولنا رسالة مهمة جداً: إن مصر بتحب ولادها المخلصين، وبتقدر اللي بيخدمها بصدق، وإن القدوة الحقيقية مش اللي بياخد، لكن اللي بيدي من غير مقابل.

الدكتور مجدي يعقوب رجع لمصر، ومقررش يقعد يرتاح بعد كل المجد اللي حققه في لندن، لكن قرر يبني أكبر صرح طبي لعلاج قلوب الأطفال بالمجان في أسوان. مركز مجدي يعقوب للقلب بقى قبلة الأمل لآلاف الأسر الغلابة اللي ماكانوش يقدروا يدفعوا تمن عملية واحدة. هناك، الطفل بيتعالج أحسن علاج في العالم، ببلاش، وبكل حب وكرامة. وهناك، الدكاترة الشباب بيتعلموا يعني إيه تكون دكتور بجد، مش بس بالشهادة، لكن بالإنسانية.

عشان كده، محبة الرئيس السيسي للدكتور مجدي يعقوب مش محبة شخص لشخص، دي محبة وطن كامل لراجل شال اسم مصر على كتفه ورفعه في كل حتة في العالم. الرئيس شايف فيه النموذج اللي نفسنا كلنا نشوفه في كل دكتور، وكل مهندس، وكل معلم، وكل مصري بيحب بلده.

إحنا فعلاً محتاجين 10 آلاف مجدي يعقوب. محتاجين 10 آلاف قلب رحيم زي قلبه، و10 آلاف عقل عالم زي عقله، و10 آلاف إيد بتشتغل عشان تنقذ حياة الناس من غير ما تستنى شكر ولا مقابل.

يا ريت كل دكتور يكون زي الدكتور مجدي يعقوب. يا ريت كل دكتور يفتكر إن الطب مش تجارة، الطب رسالة. وإن المريض اللي داخل عندك ده مش رقم في كشف، ده بني آدم، ده أب وأم مستنيين ابنهم يرجع يضحك تاني، ده طفل بيحلم يكبر ويعيش زي باقي الأطفال.

الدكتور مجدي يعقوب علمنا إن العظمة مش في الفلوس ولا في المناصب، العظمة في إنك تسيب أثر طيب في حياة الناس. علمنا إن اللي بيزرع خير، بيحصد حب الناس كلها، وبيفضل عايش في قلوبهم حتى بعد ما يمشي.

تحية من القلب للرئيس السيسي اللي قدر قيمة هذا الرجل العظيم، وتحية أكبر للدكتور مجدي يعقوب، طبيب القلوب، اللي بقلبه أنقذ قلوب الملايين، واللي هيفضل فخر مصر وفخر الإنسانية كلها.

ربنا يطول في عمرك يا دكتور مجدي، وتفضل منور حياتنا، وتفضل قدوة لكل الأجيال الجاية، اللي هتتعلم منك إن مصر ولادة، وإنها طول ما فيها ناس زيك، هتفضل بخير وقوية وعظيمة.

في لحظة من اللحظات اللي بتفضل محفورة في ذاكرة الوطن