دكتور عبدالله أحمد بيقولك ازاي اطلب احتياجاتي من شريك حياتي ؟

دكتور عبدالله أحمد بيقولك ازاي اطلب احتياجاتي من شريك حياتي ؟

متابعة نشوى شطا

التعبير عن الاحتياجات مهارة بيفتقدها ناس كتير وللأسف بتكون سبب في عدم فهم الطرفين لبعض وبالتالي بيكون فيه مشاكل وخلافات متراكمة كتير بدون أي حل.

وهنا يشير مستشار الدعم النفسي د.عبدالله أحمد لازم نكون فاهمين إن الخلافات دي جزء طبيعي جدًا في أي علاقة، ولكن المهم نكون عارفين إزاي نتواصل مع بعض بشكل سليم ونعبر عن احتياجاتنا.

ويضيف د.عبدالله أحمد هقولك ٤ طرق عشان تقدري تعبري عن احتياجاتك بشكل سليم:

1. اتخلصي من مشاعرك السلبية قبل ما تبدأي في أي حوار مع شريكك، لأنك لو حاولتي تعبري عن احتياجاتك وجواكي مشاعر من الزعل أو الغضب غالبًا هيكون صعب إنكم تفهموا بعض وتحلوا المشكلة.

2. اختاري الوقت المناسب عشان تتكلمي مع شريكك وممكن كمان تديله فكرة إنك محتاجة وقت تتكلمي معاه في موضوع مهم وبكده تكوني ضمنتي إن الوقت مناسب.

3. ابدأي الحوار ب “أنا” ومشاعرك بدل ما تقولي “أنت”. فمثلًا، ممكن تقولي جملة زي “أنا بحس بالأذى إنك دايمًا مهتم بشغلك” بدل ما تقولي “أنت دايمًا مهتم بشغلك”.

4. حاولي دايمًا تسمعي شريكك وهو بيتكلم وتفهمي مشاعره.

الطرق البسيطة دي بتغير شكل العلاقة مع الشريك وبتخلي التعبير عن الاحتياجات أسهل بكتير، وبالتالي علاقة ناجحة بين الأخد والعطاء.

ويؤكد استشاري العلاقات الاسرية والتربوية أغلب الناس عندهم مشكلة واضحة في التواصل وانهم يطلبوا احتياجاتهم من شركائهم في العلاقات المختلفة، وده لأننا بنكرر الطريقة اللي شوفنا أهالينا بيتواصلوا مع بعض بيها اللي أغلبها مفيهاش توضيح صريح للمشاعر أو الاحتياجات.

ويضيف لازم تبقى عارف إن شريك حياتك مش المفروض يقرأ دماغك، ولا أفكارك، ولا احتياجاتك، لازم أنت تكون عارف ايه هي احتياجاتك، وتعرف تطلبها بشكل واضح وصريح.

وينصح دكتور عبدالله أحمد لما تيجي تطلب حاجة من شريك حياتك، لازم تطلبها بأسلوب يخلي اللي قدامك يتقبل إنه يسمع منك، فمثلا:

– بدل ما تقول “مشاعري دايمًا مش فارقة معاك”، ممكن تقول “أوقات بكون محتاج أتكلم أكتر عن مشاعري، ونفسي تسمعني من غير ما تحكم عليا”.

– بدل ما تقول “عمرك ما بينتلي إنك مهتم بيا”، ممكن تقول “هكون مبسوطة أوي لو كتبتلي أو بعتلي رسالة كل فترة تبينلي إنك مهتم وبتفكر فيا”.

– بدل ما تقول “أنت دايمًا مشغول عني”، ممكن تقول “بقالي فترة حاسس إننا مش بنتواصل كتير، ممكن ناخد يوم اجازة نقضيه سوا؟”

ويختتم دكتور عبدالله أحمد مستشار الدعم النفسي كلامه أن الوضوح والصراحة في العلاقات هي أهم خطوة للتفاهم والاستمرار، وأحيانًا التعبير عن احتياجتنا بيكون صعب علينا ومش متعودين عليه، وبالتالي ده بيأثر على حياتنا سوا..

لو مش قادر تحدد احتياجاتك وتعبر عنها بصورة واضحة جرب تستعين بحد متخصص يساعدك تتواصل مع نفسك بصورة أحسن وتتعرف على احتياجاتك، فتقدر تتواصل مع غيرك وتعبر لهم عن احتياجاتك من العلاقة معاهم.