هتنسوني ولا
اعرفوا لما ما اغيب عنكم
ساعتها هكون بعيدة
يبقي اللي باقي مني حبة صور
وكام مقالة في الجريدة
وصفحة فيس مليانة بالذكريات
يومها اقرؤها بتمعن
م الغلاف للغلاف والكلام بين السطور
شموا ريحتي في الكلام
كل نقطه وكل حرف
يحكي عني ابتسامه عشتها
عن قلب غني في الصبا
لعبه فرحه يوم العيد
دمعه جات من غير مواعيد
كنت وسطيكم عشت ليكم
عشت بيكم عشت ضيفه خفيفه
كانت وفاء وفية ليكم
ولا …..مية سؤال ومية جواب
في صفحة الفيس م الغلاف للغلاف
لم اغيب هتقولوا كانت شقية بس طيبه
كانت خدومة كانت سريعة الغضب
راح توصفوني بكل شكل وكل لون
ناس ساعتها بتحبني تمدحني وتودني
بالدعاء …..ناس ساعتها عجيبه
تشمت فيا بطريقه غريبه حتي بعد غيابي
بساعات ….قولوا ليهم اهي راحت وغابت
بكره هتكونوا في مكانها كلنا مكتوب
علينا الغياب ….مهما طال العمر بينا
اخرتها حبة تراب …والباقي سراب
افهموها بقا …..حبوا بعض في الحياه
وبعد الغياب …..كلنا ذكري وسيرة
والمسيره مكمله ….. وعجبي
✍️ وفاء عبدالغفار
هتنسوني ولا
