نبض عابر بقلم/ناني عادل

في لحظات كتير نحس ان الدنيا بتجري اسرع من قدرتنا على اللحاق وان الوقت يفلت من ايدينا كأنه موجة بتكسر قبل ما نلمسها ورغم كل ده ييجي نبض عابر جوه القلب يعيد ترتيب كل حاجة نبض بسيط لكنه قوي يفتح باب كنا فاكرينه مقفول ويصحينا من تعب طول
النبض ده يظهر من كلمة حقيقية او نظرة ما توقعناش تأثيرها او فكرة تكسر جدار الصمت اللي بنبنيه حوالينا من سنين نلاقي نفسنا فجأة بنفهم حاجات ما كناش شايفينها ونقوى على قرارات كنا بنهرب منها ونستعيد ايمان فقدناه مع الوقت لكن رجع مع اول نبضة صدق
مرات كتير نعيش نحارب التعب ونكتم الاسئلة ونتظاهر اننا بخير قدام الناس لكن جوانا تنطفئ حاجات بدون ما نحس لحد ما يجي نبض عابر يعيد فينا الحياة اللي افتكرنا انها راحت يذكرنا اننا مش مجرد جسد ماشي في الزحمة لكن روح محتاجة كلمة وراحة ونور صغير يلمع في اخر الطريق

والغريب ان النبض ده مش دايم ولا ثابت لكنه يظهر وقت ما نكون محتاجينه بصدق وقت ما نكون واقفين بين الاختيار والاستسلام وبمجرد ما يحضر نلاقي الطريق ينكشف قدامنا وكأن الدنيا كانت مستنيانا نسمع اللحظة الصغيرة دي عشان نستمر
نفهم ان الحياة مش دايما محتاجة خطوات كبيرة ولا معجزات عشان تتغير احيان تكون محتاجة مجرد نبض عابر يعيد الروح مكانها ويصلح وقتها ويخلينا نرجع نقول لنفسنا اننا لسه نقدر وان اللي جاي ممكن يكون احسن بكتير من اللي فات

نبض عابر

بقلم/ناني عادل