تحذير هام لأهالي السويس.. لا تشتري شقة قبل ما تروح الحي

تحذير هام لأهالي السويس.. لا تشتري شقة قبل ما تروح الحي!

بقلم: وفاء عبد الغفار

رسالة وتنبيه لكل مواطن شقيان، لكل أسرة بتحط شقى عمرها في شقة عشان تستر أولادها..

أوعى تشتري عقار أو شقة في عقار قبل ما تتوجه للحي التابع له العقار.

أيوه، قبل ما تدفع جنيه واحد، وقبل ما تمضي عقد، خد بعضك وروح الحي واسأل سؤال واحد:

هل العقار ده ليه ترخيص؟ وهل الترخيص قانوني وسليم وبعدد الأدوار الموجودة فعلاً؟

الموضوع مش هزار يا جماعة، الموضوع فيه سلامة وسلامة أسرتك. العمارات اللي بتتبني بدون ترخيص أو بتاخد ترخيص 4 أدوار وتطلع 10 أدوار، دي قنبلة موقوتة ممكن تقع فوق دماغ اللي فيها في أي لحظة.

حياتك مش لعبة، وفلوسك مش لاقيها في الشارع.

نصابين كتير بيبيعوا الوهم للناس، يفرشلك الشقة ويقولك دي لقطة، ويلا امضي، وبعد ما تدفع تكتشف إنك اشتريت مخالفة، وإن الحي ممكن ييجي يزيل، وإن فلوسك راحت، وإنك مهدد أنت وأولادك.

القاعدة الذهبية: الحي هو الفيصل.روح بنفسك، اسأل في التراخيص، اطمن على ورقك، اطمن على عدد الأدوار المرخصة، هل هي نفس الأدوار المبنية ولا فيه أدوار مخالفة؟ هل الأرض مرخصة مباني ولا زراعية؟ هل فيه رسوم تصالح ولا لأ؟

دقيقة في الحي توفر عليك سنين من الندم والمحاكم والقضايا.

اللهم بلغت.. اللهم فاشهد.

حافظوا على شقى عمركم، وحافظوا على أرواح أولادكم.

لا تشتري قبل أن تسأل في الحي.. لسلامتك وسلامة أسرتك.

تحذير هام لأهالي السويس.. لا تشتري شقة قبل ما تروح الحي