اللى مايشوفش من الغربال يبقى أعمى

اللى مايشوفش من الغربال يبقى أعمى

كتب/سعيد ابراهيم

‏خلى بالك المؤامره كبيره على مصـــــــــر
لا البرلمان الأوروبي صحى من النوم فجأة
ولا مديرة صندوق النقد الدولي مهبدتش التصريح في التوقيت ده صدفة
ولا الكونجرس الأمريكي ما ركزش معـــــــــانا كدة فجأة
ولا اللى بيحصل في السودان توقيته صدفة
واللي متابع في الشهور الأخيرة أكيد لاحظ ان الايام الجاية ستشهد تكثيف محاولات التدخل فى الشأن المصـــــــــرى و التأثير على الانتخابات المصـــــــــريه

المهم دلوقتي ان الناس تكون فاهمة حقيقة اللي بيحصل واللعبة بتتلعب ازاي لان فكرة اننا عرايس ماريونت بيحركوها على مزاجهم مش ممكن هنرضخ ليها!!

⭕الجديد اللى بيحصل من إمبارح فى حدودنا الشرقية .. وسيبك من الفعل نفسه .. وسيبك من اللى عمال يهلل وفرحان باللى حصل .. كلنا عارفين مين هي “حماس” .. وإنها مقاومة مصنوعة .. وإن سلاحها دايما موجه لمصر قبل مايتوجه لدولة الكيان .. ومش هــ ننسى اللى عملوه مع مصر فى 2011 .. ومابعد 2013 .. واللى عايز ينسى هو حر … لكن سيبك من كل ده .. سيبك من الفعل ، وركز فى رد الفعل اللى هــ ييجى من دولة الكيان … ياترى الحال هيبقى إييه لما يتم الرد بمنتهى العنف على الداخل فى غزة دون التفرقة بين “حماس” وبين المدنيين الأبرياء .. ياترى الوضع هــ يبقى إييه لو تم الدفع بمئات الألاف لإجتياح المعبر فرارا من القصف المركز ..

ساعتها هتلاقى العالم كله بيرقص رقصة الموت .. ومش هــ يطالبوا إسرائيل توقف الضرب .. لكن هــ يطالبوك بفتح المعابر وإحتواء اللاجئين الفارين من الموت .. و ده قانون دولى على فكرة … ويالا بقى .. مش انت عندك 9 مليون لاجئ .. مافيهاش حاجة لما يزيدوا كمان إتنين مليون .. ويبقى كدة القضية خلصت والمشكلة إتحلت …
و ده مش كلامنا .. ده كلام “النتن-ياهو” على فكرة امس لما طالب الفلسطينيين بــ إخلاء غزة

الخلاصة .. جارى إكمال الطوق النارى حوالين مصر

الحدود الغربية فى ليبيا غير مستقرة .. والحدود الجنوبية فى السودان مشتعلة .. والحدود الشمالية فى المتوسط فيها تحديات بسبب ملف الغاز .. وبــ يتم تفجير الحدود الشرقية مع دولة الكيان .. وبــ يتم تهديد الدولة فى ملف قناة السويس .. وكدة يبقى حدودك كلها مشتعلة ..

والملف الإقتصادى بيتم الضغط عليك فيه من كل الأطراف .. الأعداء والأصدقاء للأسف ..

الملف الداخلى فيه تحديات بتتصاعد بشكل غريب وبلا تفسير

بــ يتم حصار مصر إعلامياً بشكل مبالغ فيه .. وبتركيز غير طبيعى .. حتى من القنوات الإعلامية التابعة لدول صديقة .. بحيث إنك مش بتلاقى غير أخبار سلبية وبس عن مصر …
ياراجل ده الأرجنتين ولبنان اللى على شفا الإفلاس مافيش حد بيتكلم عنهم كدة !!

السوشيال ميديا .. حدث ولا حرج .. ومش هــ نكرر كلامنا تانى فى النقطة دى !!

هيطلع حد يقولك ، ماتبطلوا نظرية المؤامرة دى بقى ..
وببساطة خالص هــ نقول له ، دى مش مؤامرة خالص .. ده مخطط مكتمل الأركان .. ومافيش صورة بتتجمع كدة ، بالتناغم ده .. ويبقى كل ده صدفة .. واللى مايشوفش من الغربال يبقى أعمى .. فــ ياريت بقى تخليك فى كوزك لما نعوزك .. وماعتقدش إن فيه حد وطنى بيحب بلده وبــ يغير عليها ممكن يعوز واحد زيك !!

طب السؤال بقى اللى بيطرح نفسه …

إييه اللى مصر رافضاه ومش عايزة تعمله .. أو بتعمله وبتنفذه على الأرض فعليا والمفروض إنها ماتعملوش ، واللى يخلى كل ده يحصل معاها

إييه اللى مصر مش عايزة تتطاطى فيه ، واللى مخلى الفرقاء كلهم يجتمعوا عليها بالشكل ده ..

إييه اللى الرئيس السيسى رافض إنه يحصل ، واللى يخلى واحد زى أحمد طنطاوى ((لسان حال من خلفه)) .. يطلع يهدد بشكل علنى قبل ترشح الرئيس السيسى للرئاسة ويقول إن الأفضل للسيسى إنه مايترشحش .. لأنه كدة كدة هــ يكون رئيس سابق لأى الأجلين أقرب …..
أنتم فاهمين معنى الجملة دى إييه !!؟ ..
الجملة دى مش ممكن تكون صادرة إعتباطا من مجرد مرشح محتمل !!

إييه اللى الرئيس السيسى رافض إنه يحصل واللى يخليه يقول إن اللى بيحصل فى مصر هــ يتم سواء كنت موجود أو مش موجود !

إييه هى التهديدات اللى بتواجه السيسى خلف الأبواب المغلقة ، واللى تخليه يطلع يقول ويكررها أكثر من مرة ، إنه مش بيخاف من الموت .. وإنه مؤمن إنه لما يحين أجله ، ماحدش هــ يقدر يقدمه أو يأخره ثانية

إييه المطلوب من مصر ، او مطلوب من السيسى تحديداً إنه يتعمل .. وهو موقفه .. واللى يخلى موضوع ترشحه للرئاسة لفترة كمان هو مسألة وجودية لبعض أو خلينا نقول لكثير من الأطراف سواء كانت داخلية أو خارجية.

على المستوى الشخصى .. حتى لو كان عندنا إجابة عن بعض التساؤلات ..
لكن فى المجمل .. مايهمناش نعرف إجابة السؤال
وارد إننا نعرف بعدين …
و وارد إننا مانعارفش ..

لكن اللى يهمنا فعليا .. إننا نبقى شايفين اللى بيحصل
وفاهمينه

واللى مش عايز يشوف هو حر ..
زى ماكان مش عايز يشوف فى 2011 وفى 2013 و فى الفترة من 2014 إلى 2017
والأيام بـــ تفرز …
#حفظ_الله_مصر 

اللى مايشوفش من الغربال يبقى أعمى