كان رسام

( كان رسام )

بقلم الشاعرة / دينا أبوزيد

كانت قاسية وهو صابر
كات بترفض كان يعافر
كان بيتمناها بس تكلمه
لو بس كلمة
أو في يوم يرمي السلام
فترد هي : وعليم السلام
كــان رســام
وكانت هي تحب رسمه
كات تملي تقول في إسمه
أيوة ده الرسام صديقي ويااااه
على الرسم اللي راسمه
وهو كان جواه عــزا
كل يوم بيشيع مراسمه
كات دايما تقول رسمه جميل
كانت عاملة جو صُحبة
وكانت عاملة حضور جميل
وهو برضه كان عفي
شاب حاذف من قاموسه
كلمة مستحيل
عاش بيوفي وكان وفي
أمّا هي…. كات مُصِرَّة تختفي
بس مش إصرار بقصد
هي بس معندهاش الجرأة على الكلام
وبرضه كان يتمنى يوم يرمي السلام
فترد هي : وعليكم السلام
مكانتش قاصدة تعذبه
مكانتش قاصدة ينام في يوم
ودموع عيونه تغلبه
أو إنه يبقى مريض في يوم
يتمنى كلمة تطيبه
مكانتش عارفة ان بعادها بيتعبه
ولما قدرت تنتصر راحت وقالت تعتذر
جالــها رده مُنكســر
أنا كنت بتدارى م الناس والملم كسرتي
كنتي أُنسي فـ وحدتي
كنت برسم كل يوم حتة في ملامحك
واما كملت رسمتي.. حطيتها تحت مخدتي
واما يوم أمي شافتها جات قالتلي : هي دي ؟!
هي دي اللي وانت عيان كنت تنطق إسمها
هي دي اللي فضلت أيام بتتقن رسمها ؟!
مش هلومك، عشان القلب معليهش سُلطة
بس يا ابني ليك مذاكرة…. لية حياة
والحياة من غير معافرة مش حياة.
معذورة أمي ، مكانتش تعرف ان حبي ليكي
عندي انا هـــو الحـيــاة
وان انا من يوم ما وعيت ع الدنيا شوفتك
وان قلبي بيكي حس وان عمري ليكي بس
فتحت عيني ع الدنيا التقيتك
واني حتى عشقت بيتك والبيبان
رسمت وشك ع الورق وعلى الحيطان
عرفوني من شكلي الجيران
قــالــوا عــاشــق
لـكـن الــمــعشــوق بعــيــد
عايز اقولك ان انا لو كنت اشوفك
كان بيبقى اليوم ده عـيـد
كنتي ليه دايماً بعيـــد؟؟ تعبوا ويايا الصحاب
تاهــوا في التــشــخيص دكاترة وكتبولي دوا
وأنا عجِز الطب فيا… قالوا العلاج مش في الدوا
الـــعِلَّـــة عــنــده فــي الهــوىٰ
فيه قلب بهواه اكتوىٰ ومحروم وداده زوّد سُـهــاده
تــــعرفـــي ……
كنت بشوفك في الــســمـا ويـا النجوم وفي الغيوم
كنتي زي سحابة بيضا شايفها وحدي في العلوم
كنت بتمنى ارمي السلام فتردي انتي : وعليكم السلام
ويفضل سؤالي اللي محيرني سنين : مين يُلام ؟!
انتي كنتي مش قاصدة الوجع
ولا حتى حاسة بالشعور
وأنا حتى مقدرتش في يوم ارمي السلام
ويوم ما جيتي حسيتيه معدش نافع اقول سلام